Өфө депутаттары етем балаларҙың хоҡуҡтарын яҡлау буйынса ҡануниәтте камиллаштырырға тәҡдим итте. Төбәк закондарына ярашлы, етем һәм ата-әсә ҡарауы­нан мәхрүм булып, опекаға алынған балаларға аҡса түләнә. Бындай статусты биреү өсөн баланың ата-әсә­һе билдәһеҙ булырға йәки ниндәйҙер сәбәптәр арҡаһын­да сабыйын ҡарай алмай тип танылырға тейеш. Ләкин ата-әсәнең үлеү осрағы был исемлектә сағылдырылмаған.
Депутаттар “Опекундарға (попечителдәргә) баланы ҡарауға аҡса түләү тәртибе һәм күләме тураһында”ғы республика Законына төҙәтмәләр индерергә тәҡдим итте. Дәүләт Йыйылышы – Ҡоролтай депутаттары менән осрашыуҙа Өфө ҡала Советы рәйесе Валерий Трофимов ошо башланғыс менән таныштырҙы.
– Ниндәйҙер сәбәптәр арҡаһында ата-әсәһен юғалтҡан бала­ларға аҡса түләнә, ә ата-әсәһе вафат булған сабыйҙарға закон менән түләү ҡаралмаған. Шуға күрә исемлекте “ата-әсәнең үле­ме” тигән пункт менән тулыландырырға кәрәк тип иҫәпләйбеҙ, – тине ул.
Өфө ҡала Советы рәйесе шулай уҡ баш ҡала биләмәһендәге балалар йорттарына мәктәпкәсә йәштәгеләр менән эшләүгә лицен­зия биреү мәсьәләһен хәл итергә саҡырҙы. Был сабый­ҙар­ҙың бүтән ҡалаларға ебәрелеүе менән бәйле. Башҡортос­тандың мәғариф министры урынбаҫары Филүс Миназов Өфө депутаттары башланғысын хуплап сыҡты.