Рәсәй Хөкүмәте торлаҡ алыу өсөн Әсәлек капиталы аҡсаһын күсереү ваҡытын байтаҡҡа кәметеү мөмкинлеген биргән ҡағиҙәләрҙе раҫланы.
– Мин тейешле ҡарарға ҡул ҡуйҙым. Ул Әсәлек капиталын торлаҡ шарттарын яҡшыртыуға йүнәлтеү ҡағиҙәһен ғәмәлдәге ҡануниәт менән яраштыра. Бынан тыш, унда ата-әсәнең ғаризаһы буйынса ыңғай ҡарар ҡабул ителгән мәлдән алып капитал аҡсаһын күсереү ваҡыты бер айҙан 10 эш көнөнә тиклем ҡыҫҡартыла. Тимәк, аҙыраҡ көтөргә тура киләсәк, – тине Дмитрий Медведев вице-премьерҙар менән үткәргән кәңәшмәлә.
Ул шулай уҡ Әсәлек капиталы бирә башлауға быйыл ғинуарҙа 10 йыл тулыуы хаҡында әйтте. Ошо ваҡыт эсендә ярҙамдың был төрөнән 5 миллионға яҡын ғаилә файҙаланған. Вице-премьер Ольга Голодец граждандарҙың күпселеге Әсәлек капиталын һорап, электрон формала мөрәжәғәт итеүен билдәләне.
Эксперттар баһалауынса, Әсәлек капиталы демографик хәлде яҡшыртыуға булышлыҡ итә, Рәсәйҙә һуңғы дүрт йылда халыҡ һанының артыуы күҙәтелә.