Тәтешле районының Бүл-Ҡайпан ауылында күп йүнәлешле мәҙәниәт йорто асылды. Тантанала район хакимиәте башлығы урынбаҫары Рәлиф Рәхимов, ауыл биләмәһе башлығы Хәлит Әйүпов, шулай уҡ Тәтешлеләге клуб һәм китапхана учреждениелары етәкселәре, белгестәр ҡатнашты.
Яңыртылған учреждениела халыҡтың мәҙәни ялы өсөн бөтә шарттар тыуҙырылған. Бинала китапхана, музей, теннис, биль­ярд, тренажер бүлмәләре, банкет залы бар. Тауыш аппара­тураһы, яҡтыртыу ҡорамалдары, музыка ҡоралдары, мультимедиалы проектор, телевизор, спорт кәрәк-ярағы, йыһаз һатып алынған. Тамаша залы 280 кешегә иҫәпләнгән. Бында “Таң”, “Райхан”, “Ихлас”, халыҡ уйын ҡоралдары ансамблдәре, “Сәйлән” фольклор коллективы, бильярд, шахмат-шашка, өҫтәл теннисы клубтары эшләй.