Ошо көндәрҙә Ҡаҙағстандың Алматы ҡалаһында ХХVIII Бөтә донъя ҡышҡы универсиада асылды. Халыҡ-ара студент спорты федерацияһы үткәргән сара 8 февралгә тиклем дауам итәсәк.
Универсиадала донъяның 50-нән ашыу иленән 2 меңдән ашыу спортсы ҡатнаша. Уларға 85 награда комплекты тапшырыласаҡ. 223 спортсынан торған Рәсәй йыйылма командаһында Башҡортостан вәкилдәре лә бар. Шорт-тректа миҙал өсөн Анастасия Мигунова алышасаҡ. Ҡарлы үркәстәрҙе сноубордсы Антон Копривица, фристайлсылар Радмир Гәрәев, Алексей Соловий һәм Елена Зайцева бойһондорасаҡ.
Башҡортостанда тәрбиәләнеп, әле бүтән төбәктәр өсөн сығыш яһаған спортсыларыбыҙ ҙа бар. Мәҫәлән, сноубордсы Владислав Ҡорамшин – Силәбе, саңғысы Ольга Репницына – Төмән өлкәһе, конькиҙа йүгереүсе Виктор Лобас Санкт-Петербург абруйын яҡлаясаҡ.
Бөтә донъя студент уйындары программаһына һигеҙ мотлаҡ спорт төрө – саңғы ярышы, биатлон, тау саңғыһы спорты, керлинг, сноуборд, хоккей, шорт-трек, тағы ла өҫтәмә дүрт төр – конькиҙа һәм саңғыла йүгереү, саңғы кейеп трамплиндан һикереү, фристайл инә.