Өфөнөң Октябрь районына ҡараған Нуғай ауылында 825 урынлыҡ мәктәп төҙөлөп бөтөп килә, тип хәбәр итә “Башинформ” мәғлүмәт агентлығы.
Әлеге ваҡытта яңы бинала биҙәкләү эштәре алып барыла, инженер селтәрҙәре һуҙыла. Белем усағы киләһе уҡыу йылына әҙер булырға тейеш. Бынан тыш, әүҙем төҙөлгән биҫтәлә балалар баҡсаһының икенсе корпусы һалынған, ул беренсе бинаға көсөргәнеште кәметергә һәм балалар сиратын ҡыҫҡартырға мөмкинлек биргән.
– Нуғай ауылы халҡы өсөн яңы мәғариф үҙәге төҙөлөүе – күптән көтөлгән ваҡиға. Бында эшләп килгән берҙән-бер 147-се дөйөм белем биреү мәктәбе ҡырҡ йыл элек һалынған, әлеге ваҡытта унда 500-ҙән ашыу бала уҡый, – тинеләр район хакимиәтенең алыҫ биләмәләр менән эшләү буйынса бүлегендә.