Боҙло ямғыр яуыуы арҡаһында республика юлдарындағы хәл киҫкенләште. Боҙлауыҡ автоһәүәҫкәрҙәр һәм йәйәүлеләр өсөн ҡыйынлыҡтар тыуҙыра, әйтерһең дә, водителдәрҙе оҫталыҡҡа һынай. Тик был имтиханды бөтәһе лә уңышлы тапшыра алмаған. ЮХХДИ-нан хәбәр итеүҙәренсә, ял көндәрендә 120 юл-транспорт ваҡиғаһы теркәлгән. Уларҙа өс кеше һәләк булған, 25 кеше төрлө тән йәрәхәттәре алған.
Өфө, Октябрьский, Туймазы ҡалаларында һәм Баҡалы ра­йонында хәл киҫкен булған. Октябрьский ҡалаһында “Нефаз” автобусы ағасҡа бәрелгән, ә “КамАЗ” йөк автомобиле икмәк һатылған киоскка барып ингән. Туймазы ҡалаһында ла ошолар­ға оҡшаш авария теркәлгән, уларҙа башлыса йөк автомобил­дәре зыян күргән.
Сибай – Баймаҡ юлында еңел автомобиль менән идара итеүсе ир тиҙлекте арттырыу сәбәпле, боҙлауыҡҡа эләгеп, юл ситенә сыҡҡан һәм түңкәрелгән. Авария урынында ҡотҡарыусылар эшлә­гән. Иң аяныслы – өс бала төрлө тән йәрәхәттәре алған. Ҡазалан­ғандарҙың барыһы ла дауаха­наға оҙатылған.
Боҙло ямғыр арҡаһында юл­дарҙа зыян күреүсе йәйәүлеләр һаны ла бермә-бер артҡан. Ял көндәрендә Өфөлә генә трав­пункт­ҡа 250-гә яҡын кеше мөрә­жәғәт иткән.
Гидрометеорология үҙәге хәбәр итеүенсә, дүшәмбенән һауа торошо үҙгәрәсәк. Ҡарлы-ямғырлы йылы циклон һыуыҡ һауа мас­саһына урын бирә. Республикала һыуытасаҡ, көндәр аяҙ торасаҡ.
Юлдарҙағы ҡатмарлы хәл тура­һында Башҡортостандың ЮХХД инспекцияһы ла иҫкәртә. Авто­һәүәҫкәрҙәргә ваҡытлы­са оҙон юлға сыҡмаҫҡа, маршрут автобустарына өҫтөнлөк бирергә кәңәш ителә.