Сәнәғәт тармағын үҫтереү маҡсатында тормошҡа ашырылған саралар араһында “Мин химияны яратам” тип аталған белем биреү проекты бар. Уға ярашлы, күптән түгел баш ҡала уҡыусыларына үҙенсәлекле дәрестәр күрһәтелде.

Сара Өфө дәүләт нефть техник университетының Йәштәр технопаркында ойошторолдо. “Химия һәм тормош” фәнни-популяр журналы­ның баш мөхәррире Любовь Стрельникова, шулай уҡ ошо өлкәләге башҡа белгестәр уҡыусылар менән педагогтарға оҫталыҡ дәрестәре күрһәтте, мауыҡтырғыс интерактив уйындар үткәрҙе. Уларҙа балалар­ҙың белем, логик фекерләү, анализлау кимәле асыҡланды, һәләтте үҫтереү юлдары билдәләнде.
Белгестәрҙең фекеренсә, иле­беҙ­ҙә элек-электән химияны уҡытыу көс­лө ойошторолған. Хәҙер иһә, балалар менән ата-әсәнең дә, мәғлү­мәти мөхиттең дә башҡаса булыуын күҙ уңында тотоп, предметтың йөк­мәткеһенә, уҡытыу алымдарына заманса үҙгәреш индереү мөһим. Ғә­мә­ли эшкә иғтибарҙы көсәйтергә кә­рәк, шунһыҙ уҡыусылар күңелендә фәнгә ҡыҙыҡһыныу уятыу ауырға төшәсәк.