“Урман” операцияһы барышында ҡануниәтте боҙоуҙың 311 осрағы асыҡланған. Зыяндың дөйөм күләме 6,4 миллион һум тәшкил итә. Законһыҙ юл менән әҙерләнгән ағастың иң ҙур күләме Белорет һәм Әбйәлил райондарында теркәлгән: уларҙың һәр ҡайһыһында 150-170 кубометр ағас юҡ ителгән.
— 12 — 31 майҙа республиканың бөтә райондарында “Урман” оператив-иҫкәртеү сараһы икенсегә ойошторолдо, — ти министрлыҡтың төп белгесе Илдар Вәлшиков. — Уның барышында эске эштәр органдары менән берлектә 932 рейд, 518 тикшереү ойошторолдо.
Һөҙөмтәлә административ хоҡуҡ боҙоу тураһында 246 протокол төҙөлгән, шуларҙың 87-һе енәйәт эше ҡуҙғатыу өсөн хоҡуҡ һаҡлау органдарына ебәрелгән.