Башҡортостан мәғрифәтселәренең, арҙаҡлы мәҙәниәт һәм сәнғәт эшмәкәрҙәренең шәжәрәһен төҙөү буйынса "Шәжәрә" республика конкурсына ғаризалар тапшырыу дауам итә. Бәйгене ойоштороусылар — Башҡортостандың Мәҙәниәт министрлығы, Республика халыҡ ижады үҙәге, Башҡортостан Милли музейы, Башҡортостан Милли китапханаһы.

Сараның маҡсаты: республиканың мәғрифәтселәре һәм мәҙәниәт, сәнғәт эшмәкәрҙәре тарихына ҡыҙыҡһыныу уятыу, ғилми-тикшеренеү, тыуған яҡты өйрәнеү, этнография йүнәлештәрендәге эшмәкәрлекте әүҙемләштереү, йәш быуынды ғилми тикшеренеүҙәргә йәлеп итеү, ғаилә ижады йолаларын үҫтереү, йәш быуында зауыҡ, әхлаҡ һәм рух тәрбиәләүҙә уның әһәмиәтен арттырыу, йылъяҙмаларҙы, эпостарҙы, легендаларҙы, милли байрамдарҙы, йола уйындарын һаҡлау. Конкурста еңеүселәрҙе бер нисә номинацияла билдәләйәсәктәр.
Конкурс 1 апрелдән 15 авгусҡа тиклем өс этапта үтә. Тәүгеһе — һайлап алыу этабы. 25 майға тиклем район (ҡала) комиссияларына ғариза һәм материалдар тапшырырға кәрәк.
Икенсе этапта материалдарҙы Республика эксперт комиссияһы ҡараясаҡ (1 июнь — 30 июль). Ғаризалар һәм материалдар Республика халыҡ ижады үҙәгендә "Иң яҡшы шәжәрә төҙөүгә республика конкурсы ойоштороу комитетына" тигән билдә менән 30 июлгә тиклем ҡабул ителә.
Конкурста еңеүселәр республика "Шәжәрә байрамы"нда ҡатнашасаҡ (өсөнсө этап). Тантаналы сара 29 сентябрҙә Ҡырмыҫҡалы районында була.
Белешмә өсөн телефон: 8 (347) 289-65-50. Яуаплы — Фәнисә Ғәлләнур ҡыҙы Аҡсурина.