Иртәгә Һиндостандың Рәсәйҙәге вәкиллеге һәм шул илдең мәҙәни бәйләнештәр буйынса советы “Феррис уил энтертэйнмент” компанияһы менән берлектә “Болливудҡа билет” концерт программаһын тәҡдим итәсәк.

Әгәр Америкала кино төшөрөүҙең үҙәге итеп Голливуд иҫәпләнһә, һиндтарҙа — Болливуд. Күңелгә ятышлы йыр-моңға, дәртле бейеүҙәргә бай, шул уҡ ваҡытта тетрәнгес хәл-ваҡиғаларҙы бәйән иткән фильмдар нәҡ ошонда тыуа ла инде.
“Болливудҡа билет” өс өлөштән тора. Сағыу тамашала был халыҡ мәҙәниәтенең барлыҡ үҙенсәлеге сағылыш таба. Ойоштороусылар белдереүенсә, 90 минутлыҡ шоуҙа Һиндостандың сәхнә оҫталары ҡунаҡтарҙың күңелен асасаҡ. Һәр кемдең үҙен хәс тә Болливудта кеүек тоясағына шикләнмәй улар.
Үҙенсәлекле программаның режиссеры — Шубхра Бхардвадж. Уның егерме йылдан ашыу шундай ҙур концерттар ойоштороу тәжрибәһе бар. Был тамаша Америкала, Суданда, Ҡытайҙа, Японияла һәм башҡа илдәрҙә күрһәтелгән.
Сихри һинд моңонда тирбәлгегеҙ киләме? Улайһа 17 ғинуарҙа Башҡорт дәүләт филармонияһына ашығығыҙ. Концерт киске сәғәт 7-лә башлана. Иң мөһиме — инеү бушлай!