Аҡса эшләү урыны түгел

– Әйҙәгеҙ, әйҙәгеҙ, күптән көтә инек. Буранлап торғас, килмәй ҡуйырҙармы икән тиеберәк тә уйлағайныҡ. Юл бигерәк насар бит.
Юлыҡ урта мәктәбендә беҙҙе ихлас ҡаршы алдылар. Бер аҙ һөйләшеп, ваҡытлы матбуғатҡа яҙылыу менән ҡыҙыҡһынғас, уҡытыусылар бүлмәһе йәнләнеп китте.
– Яҙылып та ваҡытында алып булмай. Һандарын теүәл килтермәйҙәр.
– Ауылда почтальон әллә аҙна һайын алмашына тигәндәй. Хатта ҡайһы ваҡыт кем эшләгәнен дә белеп булмай: бөгөн – берәү, иртәгә – икенсеһе.
– Мәктәп үҙен ҡарарға, аҡса эшләргә тейеш, тиеүҙәре төптө дөрөҫ түгел. Ваҡытында түләй алмағас, телефонды һүндерҙеләр.
Шулай ҙа заман ауырлыҡтарына һылтанып, бурыстарына илке-һалҡы ҡарау хас түгел юлыҡтарға. Элек-электән бер төптән егелеп эшләгән коллектив тип баһалайҙар уларҙы. Ә татыулыҡ хакимлыҡ иткән ерҙә уңыш та юлдаш. Бөгөн республикала, районда етәксе урындарҙа был мәктәптән сыҡҡандарҙың күп булыуы – ошоға дәлил.
Директор урынбаҫары Альмира Яҡшыбаева гәзит-журналдарҙы дәрестә файҙаланыуы, һуңынан уҡыусылар менән фекер алышыуы хаҡында һөйләне. Барлыҡ баҫмаларҙы стенаға беркетеп баралар бында.
– Балалар ҡыҙыҡһына, ҡайһы бер мәҡәләләрҙе бер-береһенә уҡырға кәңәш итә. Айгиз Баймөхәмәтовтың “Ҡалдырма, әсәй!” тигән әҫәрен класта тетрәнеп уҡыныҡ, – тине Альмира Әхмәт ҡыҙы.

Иң матур мәктәп

Ауыл уртаһында ҡыҙыл кирбестән һалынған белем усағы әллә ҡайҙан балҡып, тирә-йүнгә йәм биреп ултыра. Былтыр районда ғына түгел, республикала беренселәрҙән булып коллектив менән гәзиткә яҙылып, яугилделәр бөтәһенә өлгө күрһәткәйне.
– Баҫма бик оҡшай, – тине Хөмәйрә апай Ғәлиәхмәтова. – Бына илле биш йыл гәзитте йыл да алдырабыҙ.
Зауыҡ менән төҙөлгән был белем усағынан ҡалалағы мәҙәниәт һарайҙары ла көнләшерлек. Тәҙрәләрҙә матур сағыу пәрҙәләр, гөлдәр шау сәскәгә күмелеп ултыра.
Ошондай көлөп торған мәктәптә эшләүе, уҡыуы үҙе бәхеттер. Районда мәктәп алдынғыларҙан һанала. Уҡыусылар төрлө конкурстарҙа ҡатнашып, мәктәптең данын арттыра. Бөтә Рәсәй “Олимпус” “Инфознайка” олимпиадаларында улар лауреат булырға ла өлгөргән.
Бындағы осрашыу ҙа йәнле барҙы. Барыһы ла Салауат Әбүзәрҙең шиғырҙарын яратып тыңланы. Гәзитебеҙгә арналған конкурста ҡатнашып, бүләктәр алды.
Унан һуң мөләйем генә бер һылыу “Башҡортостан, илгенәм” йырын һуҙып ебәрмәһенме! Бигерәк моңло тауыш. Баҡһаң, Элина Данилова икән. Ул хатта “Һаумы, һаумы, әкиәт!” республика конкурсында икенсе урынды яулаған.

“Беҙ коллектив менән алдырасаҡбыҙ”

Былтыр “Башҡортостан”ға дәррәү яҙылған Йөҙимән мәктәбе уҡытыусылары шулай тине. Вәт, афариндар! Баҡһаң, бында әле ваҡыт бар тип йыл аҙағын көтөп ултырмайҙар, сентябрь башында уҡ ваҡытлы матбуғатҡа яҙыла башлайҙар.
Мәктәп директоры Таңсулпан Рәхмәтуллина әйтеүенсә, йөҙимәндәрҙең районда үҙ йөҙө бар. Тырыштар, сәмселдәр. Тәжрибәле уҡытыусылар Роза Искәндәрова, Элита Ғөбәйҙуллина, Зөбәйер Иҙрисов, Гүзәл Ишбулдина, Фәнилә Иҙрисова, Рима Шәмсетдинова, Лилиә Ғәлимова, Рәмзиә Заһиҙуллина балаларға төплө белем биреү өсөн көсөн йәлләмәй. Әлбиттә, тырышлыҡ үҙ һөҙөмтәһен бирмәй ҡалмай. Әлфиә Иҙрисова, Алһыу Рәхмәтуллина, Фирҙәүес Мөхәмәтшина, Гөлназ Ямалетдинова, Юлиә Зәйнетдинова, Илназ Күскилдин, Искәндәр Әбсәләмов, Физалиә Рәхмәтуллина, Илмир Мөхәмәтшин, Ильвина, Илмир, Роберт Ғөбәйҙуллиндар, Илсур Рәхмәтуллин, Диләфрүз Рәхмәтуллина, Илнара Сәйфуллиналар яҡшы билдәләренә уҡый.

“Яратып уҡыйбыҙ…”

Беҙ килеп ингәндә Сәйетбаба почта элемтә бүлексәһе “гөж” килеп тора ине. Почтальондар ҙа бында. Бүлексә начальнигы Миләүшә Зиннурова былтыр илленән ашыу кешене гәзиткә яҙҙырып, еңеүсе булған Сания Фәттәхованы маҡтап бөтә алманы.
– Рәзәнә Фәйзуллина, Ғиндулла Шәйәхмәтов, Кәбир Мәүлетҡолов, Рәйсә Фәйзуллина, Ғәлимйән Шакировтар йыл да баҫмаға тәүгеләрҙән булып яҙыла. Йәштәр ҙә уларҙан өлгө алһын ине, гәзит хәҙер ҡыҙыҡлы, уҡымлы, – тине.
Шул арала Флүрә Мәүлетҡолова, Римма Фәттәхова, Гөлшат Вәлиевалар ҙа яҙылды.
– Яратып уҡыйбыҙ, – тине улар.
Алсаҡ, һүҙгә әүәҫ сәйетбабалар менән һаубуллашып, ҡайтыр юлға сыҡтыҡ. Интернет тигән заманда ла гәзиттең ҡәҙерен аңлап, уны серҙәше, юлдашы итеп баһалаусылар барлығы ҡыуандырҙы. Ә күңелдә аҡ, пак хистәр уятып, еребеҙгә тәүге өрпәк ҡарҙар һибәләй ине.