Донъя, гүйә стадион,
Ә мин —
Футбол тубылай:
Типкеләнеп үтә ғүмер
Йә тегеләй,
Йә былай...

Зыр әйләнә тирә-яғым,
Бар донъяны
Бутайым.
Был уйын да тамамланыр —
Артта ҡалды
Бер тайм.

Һәм арбитр һыбыҙғыһын
Һыҙғыртыр —
Уйын тамам.
Тыным сығыр (Аһ, үкенес!),
Тишелеп,
Берәй заман.

Ләкин күңелем йыуата,
Йыуата мине
Уйым:
Футболһыҙ булмағандай,
Тупһыҙ ҙа булмай
Уйын...

Еңеүселәр бүләкләнер...
(Ымһынма юҡҡа,
Күңел):
Нисәгә-нисә булһа ла,
Даны бит
Тупҡа түгел...

Салауат Әбүзәров