Халыҡ хәтеренә мәңгегә уйылған РСФСР-ҙың Максим Горький, Башҡортостандың Салауат Юлаев исемендәге дәүләт премиялары лауреаты, Башҡортостандың халыҡ шағиры Назар Нәжмиҙең арабыҙҙан китеүенә ун өс йыл да үтеп киткән. Башҡорт шиғриәтенең яҡты йондоҙҙарының береһе булған оло әҙиптең йырҙары телевизор, радио аша әлегәсә ҡабат-ҡабат яңғырап тороуы, иң күренекле йырсыларҙың репертуарында уның шиғырҙарына яҙылған йырҙарҙың быуындан быуынға күсеп, ныҡлы урын алыуы үҙе генә лә бик күпте аңлата.

Ә инде шиғриәт һөйөүселәр хаҡында әйтеп тораһы ла түгел. Уның ихлас лирикаһы, юғары гражданлыҡ рухында яҙылған шиғырҙары, поэмалары әҙәбиәтебеҙҙең иң юғары ҡаҙаныштары иҫәбендә.
Шағирҙы яҡташтары ла, ҡәләмдәштәре лә һәр саҡ юҡһынып йәшәй. Шуға ла Яҙыусылар союзы идараһы Дүртөйлө районы хакимиәте менән берлектә сентябрь башында шағир хөрмәтенә әҙәби осрашыу кисәләре уҙғарҙы.
— Шағир үҙе иҫән саҡта ла Дүртөйлө ере был хәтлем яҙыусыларҙы күргәне булмағандыр, — тип ҡаршыланы, үҙенең сикһеҙ шатлығын белдереп, район хакимиәте башлығы урынбаҫары Рәмил Хәсәнов.
Ысынлап та, районға Яҙыусылар союзы идараһы рәйесе шағир Риф Тойғон етәкселегендә, урындағы әҙәбиәтселәрҙе лә иҫәпләгәндә, өс тиҫтәгә яҡын әҙип килде.
Яҙыусылар туп-тура Дүртөйлөнөң үҙәгендәге мәҙәниәт һарайы алдына — шағирҙың мөһабәт һәйкәле янына туҡтаны.
Ҡаланың шиғриәт һөйөүселәре бында эркелешеп иртүк килгәйне. Яҙыусылар һәйкәлгә сәскә һалғас, тулҡынландырғыс һәм һағышлы рухта сығыш яһаны.
Һәйкәл янындағы митингта Салауат Юлаев исемендәге дәүләт премияһы лауреаты, шағир Ирек Кинйәбулатов, “Истоки” гәзитенең баш мөхәррире Айҙар Хөсәйенов, күптәрҙең оло шағирға оло һөйөүен белдереп, йөрәк һүҙҙәрен әйтте.
Унан һуң ҡунаҡтар шағирҙың тыуған ауылы Миңештегә юлланды. Улар Назар Нәжмиҙең тау башындағы ҡәберенә сәскә һалды, йорт-музейында булды.
Район үҙәк китапханаһында үткән йомғаҡлау кисәһендә Яҙыусылар союзы идараһы рәйесе Риф Тойғон, халыҡ яҙыусыһы Ноғман Мусин, халыҡ шағиры Абдулхаҡ Игебаев, ғалимә Мәҙинә Хәмиҙуллина, яҙыусылар Мөкәрәмә Садиҡова, “Ағиҙел” журналының баш мөхәррире Әмир Әминев, Дүртөйлө шағиры Рафаэль Хафизов Назар Нәжми ижадының әһәмиәте хаҡында төплө фекерҙәр әйтте, иҫтәлектәре менән уртаҡлашты.
Осрашыуҙарҙы үткәреүҙә район хакимиәте башлығы урынбаҫары Рәмил Хәсәнов, мәҙәниәт бүлеге етәксеһе Азамат Ғилманов һәм һәүәҫкәр сәхнә оҫталары тос өлөш индерҙе.