Гонаһһыҙҙар булһа әгәр
Һәм саф икән
Берегеҙ,
Ғәйепләмәм, ул саҡта таш
Башлап миңә
Бәрегеҙ.

Таш бәғерҙәр таш бәрҙеләр
Баҡсаһына
Күңелдең.
Бер гонаһтар ҡәбереләй,
Баштан ташҡа
Күмелдем.

Күңелемдә сәскәләр юҡ,
Абынаһың
Гел ташҡа.
Йәнем, ошо таш баҡсаға
Кереп, зинһар,
Гөл ташла.

Шул ташлаған гөлдәр бер саҡ
Орлоҡтарын
Сәсһәләр,
Ташты тишеп, шытып сығыр
Һин яратҡан
Сәскәләр.
Салауат Әбүзәров