Күкрәгендә хазинанан башҡа
Тәрән серҙәр һаҡлай бейеклек:
Бейеклеккә менеү генә түгел,
Төшә белеүе лә бөйөклөк.

* * *

Бөркөт тирәһендә һәр ваҡытта
Ваҡ-ваҡ ҡына ҡоштар әйләнә...
Тик дуҫлыҡҡа быны бәйләмә.

* * *

Юғарыға менһәң, баш әйләнә,
Унан түбән ҡарау ярамай.
Дәрәжәгә үрмәләгән заттар
Шуғалырмы түбән ҡарамай.

* * *

Батырға ла, ҡурҡаҡҡа ла
Ҡая уртаҡ:
Батыр башҡа менә, ә өңөнә
Боҫа ҡурҡаҡ.

* * *

Ҡаяларҙың холҡон беләм,
Ҡоролған ул хәйләгә:
Өҫтән ҡара, аҫтан ҡара —
Барыбер баш әйләнә.

Салауат Әбүзәров