Сал бөркөттәр оса һауаларҙа,
Ғорурланып башҡорт халҡына.
Оя ҡороп ҡая таштарында,
Ныҡлыҡ өҫтәй уның рухына.

Башҡортомдоң яҡты көнө өсөн
Салауаттар биргән ғүмерен.
Тыуған ерем, туған телем өсөн
Тыныс түгел һаман күңелем.

Бөтөрһәләр әгәр башҡорт телен
Маңҡорт булыпмы һуң йәшәргә?
Тартып алғас башҡортомдоң ерен,
Яттарғамы башты эйергә?

Эй, башҡортом, әйҙә, берҙәм булып
Оябыҙҙы биҙәп ҡорайыҡ.
Сал бөркөттәй ғорур, көслө булып
Башҡорт ерен, телен һаҡлайыҡ!

Зөләйха ҒИМАЛЕТДИНОВА.
Стәрлетамаҡ ҡалаһы.