* * *
Ер өҫтөн төн ҡосаҡлаған.
Туңып кителә йондоҙ.
Күҙен йомған ҡала буйлап,
Киләм маҡсатһыҙ, юлһыҙ.

Ел үҙе лә әллә өшөй, —
Һарыла ҡуйыныма.
Күрәһең, уны ла борсой
Йылыныу уйы ғына.

Ҡатып ҡалған ағастарҙың
Шаҡылдап ҡуя теше.
Инде нисәнсе төшөлөр —
Иҙерәп йоҡлай кеше.

Шағир йөрөй урам буйлап,
Йылынып йыры менән.
Күҙҙәренә тамсы тулған
Ирегән йөрәгенән.

Дер ҡалтырап тора йондоҙ,
Бөкөрәйгән туң айым...
Һалҡын тынынан халҡымдың
Туңайым да ҡуяйым...

Салауат Әбүзәров