Телебеҙҙә алты килеш, —
Улар менән килешәм.
Килештәргә килештереп,
Фекеремде бүлешәм.

Төп килеш:
Кем тиһәң, ул — төп кеше,
Күкрәк ҡағыу төп эше.

Урын ваҡыт килеш:
Урыны һәр саҡ түрҙә,
Ваҡыты булмай бер ҙә.

Төшөм килеш:
Ҡорған ул бөтә эшен
Тик алыр өсөн төшөм.

Сығанаҡ килеш:
Һис тә тартынып тормай,
Гел халыҡтыҡын урлай.

Төбәү килеш:
Миллион күҙҙәр түбәндән
Уға ғына төбәлгән.

Эйәлек килеш:
Гүйә, донъяға эйә,
Күпме кеше баш эйә.

Салауат Әбүзәров