Стәрлебаш районында “Алтын тирмә” төбәк-ара милли театрҙар фестивале тамамланды. Төп бүләкте Бәләбәй ҡалаһы мәҙәниәт һарайының “Браво” урыҫ халыҡ йәштәр театр студияһы яуланы.
“Алтын тирмә” фестивале өс йылға бер тапҡыр үткәрелә һәм иң яҡшы театр коллективтарын, уңышлы спектаклдәрҙе асыҡлауға йүнәлтелә. Фестивалгә ярашлы, үҙешмәкәр театр коллективтарына “халыҡ” исеме бирелә. Быйылғы сарала Хакасиянан, Татарстан Республикаһынан һәм Силәбе өлкәһенең Арғаяш районынан коллективтар ҡатнашты.
Республикала бөтәһе 128 халыҡ һәм өлгөлө театр коллективы бар. Шуларҙың 57-һе — башҡорт, 36-һы — татар, 29-ы — урыҫ, 4-еһе — сыуаш, 2-һе — мари, 30-ы — балалар театры.
Февраль–мартта комиссия 123 театрҙың спектаклен ҡараны, шуларҙың 12-һе маҡтаулы исемгә дәғүә итте, ҡалғандары уны раҫланы.
Сараны ойоштороусылар билдәләүенсә, быйылғы “Алтын тирмә” репертуар һайлау мәсьәләһенең әүәлгесә көнүҙәк булып ҡалыуын күрһәтте. Ҡағиҙә булараҡ, коллективтар сифаты әллә ни юғары булмаған драматургия материалын һайлай. Был айырыуса башҡорт һәм татар театрҙарына ҡағыла. Ауырғазы, Краснокама, Илеш, Балтас, Баймаҡ, Борай, Ҡырмыҫҡалы, Ҡыйғы, Мишкә, Ейәнсура, Учалы, Өфө, Яңауыл райондары, Бәләбәй, Белорет, Бөрө, Межгорье, Октябрьский ҡалаларының ижади коллективтары юғары оҫталыҡ күрһәтте.
Фестиваль йомғаҡтары буйынса Хакасия Республикаһының Аскиз районы Кызлас ауыл мәҙәниәт йортоноң хакас халыҡ театрына беренсе урын бирелде. Илеш районынан “Сагыл” һәм Ауырғазынан “Ауырғазы” театры икенсе урынды бүлеште. Учалы районының “Ҡорама”, Октябрьский ҡалаһының “Ыҡ” һәм Ишембай районының “Зөбәржәт” халыҡ театрҙарына өсөнсө урын бирелде.