Был ерҙәрҙә эпос яралған30.11.2018

Дәүләкән боронғо тарихҡа эйә икәнен күрһәтте.

Һәр яҡтың үҙенсәлеге була. Дәүләкән районы тиһәң, иң тәүҙә, әлбиттә, мәшһүр Асылыкүл, ошо ерлектә тыуған “Заятүләк менән Һыуһылыу” эпосы хәтергә төшә. Хәйер, Бөйөк Ватан һуғышы осоронда бында килеп эшләй башлаған аяҡ кейеме фабрикаһы ла, Дәүләкән оно, бөгөн инде һөт ризыҡтары ла райондың йөҙөн билдәләй. Бына ошолар һәм башҡа ҡаҙаныштар менән таныштырҙылар баш ҡала халҡын Х. Әхмәтов исемендәге Башҡорт дәүләт филармонияһында уҙған республика райондарының “Башҡортостан тарихы биттәре” тип аталған марафон-фестивалендә.

Сара башланғансы уҡ халыҡ ҡул эштәре, төбәктә етеште­рел­гән ауыл ху­жалығы продукцияһы, картиналар, мә­ҙәни, социаль, спорт сараларын яҡтырт­ҡан күр­гәҙмәләр менән таныша торҙо.

Шығырым тулы залға был төбәктән сыҡҡандар ғына түгел, ә баш ҡаланан ситтә йәшәгән­дәр­ҙең рухын, ҡотон тойоу­сылар йыйылғайны. Бына сәхнәгә Дәү­ләкән районы артистары, һәүәҫ­кәрҙәре сыҡты. Республиканың үҙе кеүек үк, Дәүләкән — күп мил­ләтле төбәк. Сығыш­тар баш­ҡорт ҡурайынан, халыҡ йырҙа­рынан, милли бейеүҙәребеҙҙән башланды һәм мәҙәни сыл­быр­ҙы башҡа милләт вәкилдәренең йырҙары, хореографик композициялары дауам итте. “Бер­ҡаҙан”, “Әхирәттәр”, “Вояж”, “Баш­ҡортостан сәс­кәләре”, “Гәү­һәр”, “Ивален” ансамблдәре сы­ғыштары бер-береһенә үрелеп, бер туҡ­тауһыҙ тамаша булараҡ ҡабул ителде.

Һирәк һәм ошо төбәктә генә баш­ҡарыла торған башҡорт ха­лыҡ йырҙарын башҡарыусы Рә­лиә Әйүпованы республикала ла яҡшы беләләр. Был юлы ла ул моңо менән таң ҡалдырҙы. Би­герәк тә йырҙы боронғоса башҡарыуы менән йәлеп итте. Ошо уҡ һүҙҙе “Заятүләк менән Һыуһылыу” эпосын башҡарған Зөләрәм Снигиреваның көйлә­үенә лә ҡарата әйтеп булыр ине. Юҡҡа ғына Бөтә Рәсәй сәсәндәр конкурсында лауреат исеменә лайыҡ булманы бит ул! “Юлдаш” йыр конкурсы лауреаты Эльвира Ҡолоева, һәүәҫкәр йырсылар Рафаэль Дәүләтбаев, Гөлфиә Шәүәлиева тамашасыларға моңдарын бүләк итте.

Һәр сығышта, һәр һүҙҙә тө­бәктең үҙенсәлеге күренеп торҙо. Район электән ҡымыҙ етештереү менән дан тотҡан. Ә уҙған йыл Республика ҡымыҙсылар ярышында беренсе урынды яуланы һәм даими рәүештә ҡатна­шып, лайыҡлы сығыш яһап килә. Дәүләкәндәрҙең бейеүе лә “Ҡымыҙ бешеү” тип атала.

Элекке дәүерҙәрҙән алып бө­гөнгөгә килеп ялғанған тарих биттәре төбәктең батырҙарын да, хеҙмәт алдынғыларын да хә­тергә алды. Видеояҙмаларҙа ра­йондың үҙенсәлекле тәбиғәте генә түгел, уңған, хеҙмәт һөйгән халҡы ла сағылыш тапты. Юҡҡа ғына әйтмәйҙәр бит: халыҡ — ил­дең төп байлығы. Концертта бигерәк тә төрлө быуын вәкил­дә­ренең сығыш яһауы, өлкән­дәрҙе йәштәр, балалар алмаштырыуы иғтибарҙы йәлеп итте, күңелде йылытты.

Дәүләкән районы хакимиәте башлығы Илгиз Мөхәмәтйәнов фестиваль-мара­фондың штандартын Ишембай районы хаки­миәте етәксеһе Марат Ғайсинға тапшырып:
— Сараны ойоштороусы Мә­ҙә­ниәт министрлығына, Халыҡ­тар дуҫлығы йортона, Бөтә донъя башҡорттары ҡоролта­йы­на, районыбыҙҙың таланттарына рәхмәт! Эстафетаны Ишем­бай ра­йонына тапшырыу беҙҙең өсөн шул яғы менән дә әһә­миәт­ле: хакимиәт башлығы — сы­ғы­шы менән Дәүләкән егете! — тине.

Ә Марат Ғайсин үҙ сиратында штандартты ҡабул итте һәм изгеләрҙән-изге Торатауыбыҙ төшөрөлгән картинаны дәүлә­кәндәргә бүләк итте.


Вернуться назад

Яндекс.Метрика