Хәйбулла

Бөгөн районда 45 һуғыш ветераны, 187 тол ҡатын һәм 799 тыл хеҙмәткәре йәшәй. Бөйөк Еңеүҙең 67 йыллығын халыҡ ҙур әҙерлек һәм ойошҡанлыҡ менән ҡаршыланы. Һәр ауыл биләмәһендә тантаналы митинг һәм һәйкәлдәргә гөлләмә һалыу сараһы үтте. Район хакимиәте башлығы Р. Хәйруллин, ветерандар советы рәйесе Р. Аллағолова, башҡа етәкселәр ололарҙы байрам менән ҡотларға һәр ауылға барҙы.

Сибай

Еңеү яҙын сибайҙар яҡшы кәйеф, күтәренке күңел менән ҡаршы алды. Байрам саралары 6 майҙа Советтар Союзы Геройҙары Федор Белов менән Александр Матросовтың һәйкәленә сәскә һалыуҙан башланды. Еңеү скверындағы “Мәңгелек ут” обелискы янында уҙған митингта һуғыш һәм тыл ветерандары, ҡаланың почетлы граждандары, депутаттар, предприятие, ойошма, учреждение етәкселәре, ҡунаҡтар һәм ҡала халҡы ҡатнашты. Ҡала хакимиәте башлығы Х. Сөләймәнов, ветерандар советы рәйесе Р. Иҙрисов тантанаға йыйылыусыларҙы байрам менән тәбрикләне.

Әбйәлил

Районда ветерандар өсөн “тура бәйләнеш” ойошторолдо. Барлығы 15 шылтыратыу ҡабул ителде. Артабан район хакимиәте башлығы Р. Сыңғыҙов һуғыш ветерандарын ҡабул итте, уларға бүләктәр тапшырҙы. Әле Әбйәлилдә 34 һуғыш ветераны йәшәй, уларҙың күбеһенә торлаҡ сертификаты тапшырылған.
Район үҙәгендә матур йолаға әүерелгән парадта һуғыш һәм тыл ветерандары, мәктәп уҡыусылары, 93-сө һөнәрселек училищеһы курсанттары, эске эштәр бүлеге хеҙмәткәрҙәре, санинструкторҙар, спортсылар ҡатнашты.

Баймаҡ

Күсей ауылында тыуып үҫкән Советтар Союзы Геройы Тәфтизан Миңлеғоловтың тыуыуына тиҙҙән 90 йыл тула. Күсейҙәр үҙҙәренең ҡаһарман улының бюсы янында хәтер һәм ҡәҙер кисәһе үткәрҙе.
Темәс ауылынан һуғыш ветераны Әбделхәлит Ирназаров менән Билалдан тыл ветераны Морат Айытбаевҡа Өфөлә үткән Бөйөк Еңеүгә арналған тантаналы сарала ҡатнашыу бәхете тейҙе. Әле районда 51 Бөйөк Ватан һуғышы ветераны йәшәй, уларға һәр яҡлап ярҙам күрһәтелә.

Йылайыр

Райондағы 19 Бөйөк Ватан һуғышы һәм 545 тыл ветеранына хакимиәт башлығы И. Фәтҡуллин исеменән ҡотлау открыткаһы һәм бүләк тапшырылды.
Йылайыр ере — илебеҙгә һигеҙ Советтар Союзы Геройы биргән төбәк, Бөйөк Еңеүҙең 67 йыллығын билдәләгән көндә яҡташтары уларҙы ҙур ихтирам һәм хөрмәт менән иҫкә алды.
К. ИШБУЛДИНА әҙерләне.