Татарстандың баш ҡалаһы Ҡазанда яҙыусы-сатирик Марсель Сәлимовтың (Мар. Сәлим) ижад кисәһе үтте. Журналистар йортона уның ижадын үҙ иткән дуҫтары – татар яҙыусылары һәм шағирҙары, республика баҫмалары мөхәррирҙәре һәм журналистары килде.


Күңелле осрашыуҙы асып, күренекле татар ғалимы һәм яҙыусыһы, оҙаҡ йылдар Татарстан Яҙыусылар союзын етәк­ләгән академик Фоат Ғәлимул­лин: “Күптәнге дуҫыбыҙ Марсель Сәлимовты беҙҙә яҡшы беләләр. – тине. – Уның сатирик әҫәрҙәре гәзит-журналдарыбыҙҙа даими баҫыла. Ҡазанда татар, башҡорт һәм рус телдәрендә Мар. Сәлим­дең биш китабы донъя күрҙе. Бөгөнгө осрашыуға беҙ бик шатбыҙ, сатира оҫтаһының тап­ҡыр һүҙен һәр саҡ көтөп алабыҙ”.
Туғандаш республиканан кил­гән ҡәҙерле ҡунаҡ үҙенең Ҡазан­ға тәүге сәфәре хаҡында хәтергә төшөрҙө: “Ул ярты быуат элек, 1968 йылдың 26 апрелендә, булды. Шул замандың талантлы йәш шағирҙары Рауил Фәйзул­лин, Зөлфәт, Шәһинур Моста­фин­дар менән бергәләп Ғабдул­ла Туҡай һәйкәле янында шиғыр уҡығаныбыҙ иҫтә, һаман да иҫтә...”
Кисәлә сығыш яһаған Рәсәй дәүләт премияһы лауреаты, Татарстандың халыҡ шағиры Ренат Харис, Рәсәйҙең Михаил Ломоносов исемендәге премия­һы лауреаты, яҙыусы һәм публицист Шәһинур Мостафин, “Чаян” сатира журналының баш мөхәррире Рафаэль Хәлилул­лов, “Ватаным Татарстан” һәм “Казанские ведомости” гәзиттәре баш мөхәррирҙәре Миңнәзим Сәфәров менән Венера Яҡупова Марсель Сәлимовтың ижади һәм ижтимағи әүҙемлеген юғары баһаланы, дуҫлыҡ бәйләнеш­тәрен нығытыуға индергән ҙур өлөш өсөн рәхмәт әйтте.
Мәртәбәле ҡунаҡ матбуғат ветерандары менән генә түгел, йәш коллегалары менән дә ихлас һөйләшеү алып барҙы, уларҙы Башҡортостандың әҙәби һәм мәҙәни тормошондағы яңылыҡтар менән таныштырҙы, һорауҙарға яуап бирҙе, шиғыр­ҙарын һәм юморескаларын уҡып ишеттерҙе. Кисәлә ҡатнашыу­сыларға махсус әҙерләнгән фотогалерея күрһәтелде, улар иғтибарына ҡыҙыҡлы һүрәттәр һәм тарихи документтар тәҡдим ителде. Кисә аҙағында ҡазандар бүләккә күренекле башҡорт сатиригының ҡултамғаһы ҡуйыл­ған яңы китаптарын алды.

Өфө – Ҡазан.