Бөрйәнебеҙҙе шиғриәт нурҙары менән яҡтыртып, имләп торған һөйөклө яҡташыбыҙ Айһылыу Ғарифуллина ла ғүмеренең алтын миҙгеленә аяҡ баҫты. Ошо уңайҙан ойошторолған кисә лә, ижадсының үҙе кеүек, шул ҡәҙәр ихлас, илаһи мөхиттә үтте. — Атайыбыҙ һеңлебеҙҙе “Айгөлөк” тип кенә йөрөтөр ине, – тип иҫкә алды байрамда шағирәнең өлкән апаһы Фәнүзә Ишбаева. – Шиғыр уҡырға ярата торғайны атайыбыҙ. Был ҡаныбыҙға һалынғандыр. Атайҙың ағаһы Баязит апам да фронттан ебәргән хаттарын шиғри юлдар менән яҙыр булған. Мәрхүм Самат ҡустым үлем түшәгендә лә шиғырҙар һөйләп ятты. Бына ошондай мөхиттә үҫте Айһылыу. Өйөбөҙгә һәр ваҡыт матбуғат баҫмаларын алдырҙыҡ, күпләп китап уҡыныҡ. Ҡағыҙ киҫәктәрендә, гәзит ситтәрендә бәләкәй Айһылыуҙың шиғыр юлдары сыймаҡланған булыр ине…
“Балҡы, әйҙә, балҡы нур булып!” тип исемләнгән был сарала шағирәнең туғандары, ауылдаштары, интернатта бергә йәшәгән тиҫтерҙәре йылы хәтирәләр менән уртаҡлашһа, Мораҙымдан китапханасы Зәлиә Тулыбаева, район мәҙәниәт һарайы хеҙмәткәрҙәре Айгүзәл Уразаева һәм Алһыу Сирбаева әҙибәнең шиғырҙарын уҡып ишеттерҙе. Ижадсының әхирәте, хеҙмәттәше Таңһылыу Баһауетдинованың үҙенсәлекле сығышы айырыуса дәррәү алҡыштарға күмелде. Шулай уҡ “Баҙал” әҙәби ижад берекмәһе етәксеһе Булат Усмановтың юбилярҙың шиғырҙарына тәржемәләрен, ошо ойошма ағзалары Гүзәл Һырлыбаева, Сәрүәр Ғәләүетдинов, Мөнир Фәйзуллин, Миңнур Ҡасимоваларҙың йөрәктән сыҡҡан һүҙҙәрен ихлас ҡабул итте тамашасы.
Шағирәне ҡотларға район хакимиәтенең мәҙәниәт бүлеге етәксеһе Клара Теләүбаева, ҡатын-ҡыҙҙар берекмәһе рәйесе Рәмилә Салауатова, Байназар ауылы ағинәйҙәре, китапханасылар килгәйне. “Элгеләү”, “Мираҫ” ансамблдәренең, Гүзәл Һырлыбаеваның йырлы-моңло сығыштары кисәне тағы ла йәмләп ебәрҙе.
Береһенән-береһе матур, ихлас теләктәр яңғыраны байрамда. Үҙ һүҙе менән шиғриәт һөйөүселәрҙең йөрәген яулаған, “күңел ҡапҡаларын әллә нисә йоҙаҡҡа бикләһәң дә, асҡысһыҙ асып инә белгән” шағирәнең, шул уҡ ваҡытта иманды донъяуи байлыҡтарҙан өҫтөн күргән баҫалҡы яҡташыбыҙҙың рух тантанаһы булды был кисә.
Бөрйән районы.