Башҡорт ҡатын-ҡыҙҙарының ижтимағи хәрәкәтендә 1995 йылдан әүҙем ҡатнашам, инде урта быуын йәшенә еткән кеше булараҡ, шуны әйтер инем: һәр ойошма йәштәргә таянғанда ғына көслө. Ул заманда Нәжибә Хәйерзаман ҡыҙы Мәҡсүтова, Фирҙәүес Ғилметдин ҡыҙы Хисамитдинова кеүек апайҙар беҙгә үрнәк булып, эшкә йәлеп итеп нисек үҫтерһә, беҙ ҙә шулай үҙебеҙгә алмаш әҙерләүҙе, улай ғына ла түгел, был тәңгәлдә үҙ мәктәбебеҙҙе булдырыуҙы маҡсат итеп ҡуйырға тейешбеҙ.

Ижадта ла, фәндә лә, спортта ла, техника өлкәһендә лә ал­дынғы йәштәребеҙ күплегенә һоҡланам һәм һәр ваҡыт уларға терәк булырға тырышам. Шуға ла заманында республика кимә­лендә “Һау-сәләмәт тормош өсөн көрәш” милли спортты үҫтереү программаһын ойош­торҙом. Ҡатын-ҡыҙҙарыбыҙға ҡағы­лышлы конкурстарыбыҙ – “Ҡатын-ҡыҙ – милләт әсәһе”, “Һылыуҡай” баш­ҡорт гүзәлдәре бәйгеһенә матди һәм ойоштороу яғынан ярҙам итәм, “Башҡорт асыҡ КВН-ы”, төрлө йөкмәткеле этнофорумдар кеүек сараларҙы үткә­реүҙә лә үҙ өлөшөмдө индерәм.
Бөгөнгө йәмғиәттә халҡы­быҙҙың һау­лығын хәстәрләү – көнүҙәк проблема­ларҙың береһе. Дәүләт һәм төрлө ойошмалар тарафынан халыҡҡа хеҙмәттәр тейешле башҡарыламы, дарыуха­налар­ҙағы препараттар, сауҙа селтәрҙәрендә һатылған аҙыҡ-түлектең сифаты ниндәй ки­мәл­дә, һаҡланыу шарттары, ва­ҡыты боҙолмағанмы – был пробле­маларҙы тикшереүгә һәм хәл итеүгә, “Берҙәм Рәсәй” сәйәси партияһының “Халыҡ контроле” проекты етәксеһе булараҡ, йәмәғәт ойошмалары вәкилдәрен йәлеп итәм.
Бөгөн милләтебеҙ ҡатындары ҙур әүҙемлек күрһәтә: ағинәйҙәр хәрәкәтендә, халыҡ ижады түңәрәктәрендә, йәки Башҡорт­остан ҡатын-ҡыҙҙар союзы советтарында, йә беҙҙең ойошмаға ҡушылып, йәшәйеште яҡтыр­тырға тырыша. Граждандар институтының бер күсе булараҡ, улар халыҡтың аһ-зарын дәүләт власы органдарына еткерергә ярҙам итә, социаль мәсьәләләрҙе хәл итеү өсөн йән ата, рухиәтте үҫтереү өҫтөндә эшләй. Был йәһәттән ярышыу ҙа яҡшы, ярашыу ҙа, йәғни ҡайһы бер проекттарҙы бергә бойомға ашырыу ҙа, минеңсә, файҙалы.
Заман башҡа – заң башҡа, һәр йыйын үҙ ваҡытының үткер проблемаларын күтәреп, ойош­ма­ның тарихына инә. Алдағы беҙҙең съезд йәмғиәт уңғандарын ижади һәм айыҡ эштәргә әйҙәй торған ҡотло көс йыйыны булһын ине. Респуб­ликабыҙҙың район һәм ҡалаларынан килеүсе де­легаттарыбыҙҙың эшлекле тәҡдимдәрен көтөп ҡалабыҙ. Киләсәккә маҡсаттар ҡуйып бергә атлайыҡ.

Гөлнур ҠОЛҺАРИНА,
Башҡортостан Республикаһы Башҡорт ҡатын-ҡыҙҙары йәмғиәте рәйесенең беренсе урынбаҫары, “Ирәмәл” комплексының генераль директоры урынбаҫары, филология фәндәре кандидаты.