Ниндәй сетерекле хәл килеп тыумаһын, һәр ваҡыт унан сығыу юлын табыр. Мәсьәләнең айышына төшөнөп, сәбәбен тәрәндән эҙләр. Ҡараштарын киләсәккә төбәп, үҙе сәскән изгелек орлоҡтарының быуаттар аша шытымын күҙаллар. Эшмәкәрлеге киң һәм күп яҡлы. Бихисап аҡсалар ағылған, уны күпләп таратҡан, матди байлыҡ, дәрәжә өләшкән ер түгел ул. Рухи таҙарыныу, туп­ланыу, берҙәмлектең көсөн, туғанлыҡтың ҡәҙерен, ҡан тартыуын тойоу аша кемлегебеҙҙе һәм тәғәйенләнешебеҙҙе аныҡ тойоп, ҡаушамай, ҡурҡмай үҙ һүҙебеҙҙе әйтеп, аныҡ эштәр башҡарыу мөмкинлеген биргән, ғәҙеллекте яҡлаған, ҡул ҡаушарып ятмаған, гүзәл заттарыбыҙҙы туплаған, донъя­ны йәмләүгә, күңелдәрҙе яҡтыртыуға дәртләндергән ҡеүәтле көс ул Башҡорт ҡатын-ҡыҙҙары йәмғиәте.

Ойошманың йәме, ҡеүәте – йән­дә­рен ҡәрҙәшлек, изгелек өсөн фиҙа ҡылырға әҙер апайҙар, һеңлеләр. Улар­ҙың йөрәк ялҡыны, дәрте, сәме ҡатын-ҡыҙҙар хәрәкәтенә көс, һут бирә.
Был ойошманың киләсәге нисек күҙаллана һуң?
Элек-электән килгән тото­роҡло йола үтәү, тормош ҡа­нундарын һан­лау, уның тәр­тибен йәш быуынға тап­шырыу, ололарҙы ололоҡлау, кесе­ләргә хөрмәт күрһәтеү, тәрбиә һабаҡтары биреү артабан да дауам ителәсәк. “Бәхетле никах”, “Нар­ду­ған”, “Сөмбөлә”, “Фатиха биреү”, “Урал батыр” байрамдары, рух, сәм, илһам күтәренкелеге бирер төрлө йыйындар үткәреү шуларҙың бер са­ғылышы буласаҡ. Мәктәп­тәрҙә “Ҡаһар­манлыҡ дәрес­тәре” уҙғарыу, яңы эш баш­лар­ға йыйынған ҡатын-ҡыҙ­ҙарға хоҡуҡи, социаль йүнә­леш­тәге кәңәштәр менән ярҙам итеү, юл ярырға булышыу, ауыр тормош хә­лендәге гүзәл заттарыбыҙҙың йө­рәгендә өмөт ҡабыҙып, йәшәү дәрте һалыу, уларҙың артабанғы тормоштарын ыңғай ыҙанға төшө­рөп ебә­рергә йоғонто яһау – ошоларҙы эш­мәкәрлегебеҙҙең төп йүнәлеш­тәре­нең береһе итеп күрәбеҙ.
Йәмғиәттең йөкмәткеһе ҡатын-ҡыҙҙарыбыҙ һәм ғаилә өсөн сыҡҡан, илле йыллыҡ тарихы булған “Баш­ҡортостан ҡыҙы” журналының асылынан айырылғыһыҙ икәне шикһеҙ. Һәр йәһәттән баҫмабыҙ нисек ҡатын-ҡыҙға рухи таяныс, кә­ңәшсе булһа, йәмғиәт тә шул юҫыҡта ғәмәли эштәр атҡа­рырға тейеш, тип күҙ алдына килтерәм.
Ижтимағи тормошта, сәйә­сәттә, со­циаль тормошта ҡа­тын-ҡыҙҙары­быҙҙың әүҙем­леген күтәреүҙе, профессиональ яҡтан балҡырға ярҙам итеүҙе мөһим бурысыбыҙ тип һана­йым. Тәҡдире буйынса милләт әсәһе булған башҡорт ҡатын-ҡыҙы теле­беҙ, халҡыбыҙ яҙмышы өсөн яуаплы зат икән­леген уйында тотор­ға, быны иң тәүҙә үҙ яҙмышында раҫ­ларға те­йеш. Йәмғиәт шул юҫыҡ­та эшлә­гәндә, ҡеүәте артыр, халыҡ араһын­да абруйы күтәрелер, уға ышаныс нығыныр.

Гөлназ ҠОТОЕВА,
“Башҡортостан ҡыҙы” журналының баш мөхәррире, Башҡорт ҡатын-ҡыҙҙары йәмғиәте рәйесе вазифаһын башҡарыусы.