Баш ҡаланың “Родина” кинотеатры залында кинорежиссер, “Аҡбуҙат” киностудияһы директоры, Рәсәй Кинематографистар союзы ағзаһы Салауат Вәхитов менән ижади осрашыу булды. Унда режиссерҙың “Аҙашҡан һарыҡ тураһында” тигән фильмы күрһәтелде һәм әңгәмә ойошторолдо.
Фильм Ғафури районының Иҫке Тайыш ауылында һәм Ишембай районында төшөрөлгән. Был кинокартина Францияла Каннылағы халыҡ-ара фестивалдә лә ҡатнашҡан.
Ҡыҫҡа метражлы фильмдың сюжеты үҙенсәлекле дини хикәйәткә нигеҙләнгән. Унда намыҫ, ғәҙеллек төшөнсәләре, ерҙәге әхлаҡи ҡанундар көслө образдар, серле күренештәр аша бирелә.
Фильм ысын мәғәнәһендә халыҡ киноһына әүерелер, тип уйлайым. Унда Башҡортостандан һәм Рәсәй кимәлендә билдәле актерҙар уйнай. Мин үҙем дә, бәләкәй саҡтан кино ҡарап үҫкән кеше булараҡ, уларҙың ыңғай тәьҫиренә ышанам. Үҙенсәлекле ваҡиғалар кешеләрҙе уйланырға, ниндәйҙер фекергә килеп, күңел таҙалығын һаҡларға саҡыра. “Фильм “Воскресенье” тип аталған кинопроекттың эсенә инеп китәсәк”, – тине Салауат Вәхитов.
Әйткәндәй, ошо фильмды үҙ эсенә алған “Воскресенье” проектының продюсеры һәм төп ролде башҡарыусы – голливуд актеры Роберт Де Ниро.