“Башҡортостан” киностудияһының “Өс хат” фильмы “Артек” лагерында уҙғарылған “Ал елкән” халыҡ-ара балалар фестивалендә уңышҡа өлгәште.


Башҡортостандың Мәҙәниәт министр­лы­ғынан хәбәр итеүҙәренсә, бала­ларҙың баһалама комис­сияһы “Өс хат”ты иң яҡшы ҡыҫҡа метражлы фильм тип таныған. Шул уҡ ваҡытта Стивен Спилбергтың “Большой и добрый великан” анимациялы таҫмаһын балалар – иң изгелекле фильм, Ким Дружинин менән Андрей Шальопа­ның “28 панфиловцев” хәрби драмаһын иң аҡыллы фильм тип баһаланы. Төп номинацияла Дмитрий Кисе­левтың “Время первых” картинаһы еңеү яуланы.
Әле Ҡырымдағы танылған балалар лагерында Рә­сәйҙең 57 төбәгенән һәм 14 илдән 3 меңдән ашыу бала ял итә. “Ал елкән” фес­тиваленең бурысы – кино сәнғәтен үҫтереү, ба­лаларға белем биреү. Фести­валдең президенты – СССР-ҙың халыҡ артисы Василий Лановой.
Әйткәндәй, “Башҡор­тос­тан” киностудия­һының “Өс хат” фильмы тама­шасыға 1941 – 1942 йыл­дарҙағы ваҡиғалар ха­ҡында һөйләй. Фронтта ҙур һуғыштар барған, донъяның яҙмышы хәл ителгән осорҙа бәләкәй генә төпкөл башҡорт ауылында тыумаған сабый­ҙың яҙмышы хәл ителә.
Фильм Ишембай һәм Ғафури райондарында төшөрөлгән. Төп рол­дәрҙе Зиләрә Юлтаева, Физәлиә Рәхимова, Вәкилә Ҡалмантаева һәм Фәрзәнә Ғөбәйҙуллина башҡара.