Свердловск өлкәһендә ХI өлкә һабантуйы үтте. Йолаға әүерелгән спорт-мәҙәниәт байрамы икенсе йыл рәттән Сысерт ҡала округының Кадников ауылында урынлашҡан “Аҡ ат” ат-спорт биләмәһендә уҙғарыла. Унда башҡа халыҡ вәкилдәре менән бер рәттән беҙҙең Хәйбулла районы хакимиәте башлығы Раил Ибраһимов етәкселегендәге делегация ла башҡорт мәҙәниәтен сағылдырҙы.


“Аҡ ат” ат-спорт комплексында Баш­ҡор­т­остан һәм Татарстан республикалары, Свердловск өлкәһенең башҡорттар ҡорол­тайы, Үрге Пышма татар милли-мәҙәни ойошмаһы, “Сулпан” татар һәм башҡорт мәҙәниәтенең Серов үҙәге үҙҙәренең милли ихаталарын булдырҙы.
Халыҡтарҙы берләштергән ҙур сараны Свердловск өлкәһе Хөкүмәте, Мәҙәниәт министрлығы, халыҡ ижады үҙәге, “Аҡ ат” ат-спорт комплексы, Татарстан һәм Баш­ҡортостандың даими вәкиллеге, “Урал та­тар­ҙары” татарҙар конгресы һәм башҡалар ойошторҙо.
Өлкә һабантуйы ошо байрамға хас бул­ған бөтә сараларҙы, йәғни ат сабыштарын, төрлө спорт ярыштарын, милли көрәште һәм башҡаларҙы үҙ эсенә алды.
Сараның почетлы ҡунаҡтары – Свердловск өлкәһе губернаторы Евгений Куйва­шев, Татарстан Президенты Рөстәм Миң­леханов, Башҡортостан Хөкүмәте Премьер-министры урынбаҫары Салауат Сәғитов – башҡа милли майҙансыҡтар менән бер рәттән Хәйбулла районы деле­гацияһы мә­ҙә­ни ихатаһында ла булды. Бында теләге булған һәр кем башҡорт йолалары, мәҙә­ниә­те менән яҡындан таныша алды. Тағы ла ошонда уҡ милли аш-һыу әҙерләү ҙур ҡы­ҙыҡ­һыныу уятты, күптәр тәмләп тә ҡараны.
Беҙҙең делегация ихатаһында сауҙа нөктәләре лә урын алып, район эшҡыуар­ҙары бал, ҡымыҙ һәм башҡа продукциялар һатты. Күргәҙмәләргә оҫталарҙың ҡул эш­тә­ре ҡуйылды, улар ҙа халыҡты күп йә­леп итте, байтағын һатып алдылар. Иха­та уртаһында урынлашҡан сәхнә ҡунаҡ­тар­ҙы үҙенә тартты. Райондың һәүәҫ­кәр ар­тистары дәртле сығыш яһаны, тамаша­сыларҙың күптәре үҙҙәре лә ихлас бейеүгә төштө. Хәйбуллалар тарафынан көршәк ватыу, тоҡ менән йүгереү кеүек сәмле халыҡ уйындары ла ойошторолдо. Уҡтан атыу айырыуса ҙур ҡыҙыҡһыныу уятты.
Башҡа милли ихаталарҙа ла халыҡ бүтән төбәктәрҙең ғөрөф-ғәҙәттәре, мәҙәниәте менән танышыу мөмкинлегенә эйә булды.
Район хакимиәте башлығы урын­баҫары Миңзәлә Баймырҙина әйтеүенсә, Хәйбулла делегацияһы һуңғы биш йылда Рәсәй төбәктәре һабантуйында дүртенсе тапҡыр ҡатнашҡан. Байрам үткән майҙанда беҙҙең милли ихата ҡунаҡтарҙа ҙур ҡыҙыҡһыныу уятты.
– Бындай оло сараларҙа ҡатнашыу еңел түгел, ул күп тырышлыҡ талап итә, әммә беҙ унда ҙур тәжрибә туплайбыҙ, – ти хакимиәт башлығы урынбаҫары. – Иң мөһиме – беҙ башҡа төбәктәрҙә йәшәгән ватандаштарыбыҙға халҡыбыҙ мәҙәниәтен күрһәтәбеҙ, уларҙы рухи яҡтан байытабыҙ.
Мөмкинлектән файҙаланып, һабантуй­ҙа ҡатнашҡан үҙешмәкәр артистарға, халыҡ оҫталарына һәм эшҡыуарҙарға рәхмәт белдерәм. Район мәҙәниәт идаралығы йылы һүҙҙәргә айырыуса лайыҡ. Шулай уҡ ярҙамдары өсөн “Бүребай тау-байыҡтырыу комбинаты”, “Башҡорт баҡыры” һәм “Альянс плюс” йәмғиәттәренә рәхмәтлебеҙ.