М. Ғафури исемендәге Башҡорт дәүләт академия драма театрының “Хыялға ҡаршы” пьесаһы (режиссеры – Илсур Ҡаҙаҡбаев) Рәсәйҙең иң яҡшы ете спектакле исемлегенә индерелгән. Шул айҡанлы, башҡорт актерҙары сентябрҙә Мәскәүҙә үтәсәк “Артмиграция” Бөтә Рәсәй йәштәр форум-фестивалендә ҡатнашыу хоҡуғына эйә булды.
“Артмиграция” фестивале – илебеҙҙә уҙ­ға­рылған абруйлы мәҙәни сараларҙың бе­ре­һе. Рәсәйҙең Театр эшмәкәрҙәре союзы унда ҡатнашыу өсөн төрлө төбәктәрҙән иң ла­йыҡ­лы эштәрҙе һайлап ала. Ойоштороу­сы­лар белдереүенсә, был исемлеккә инергә йөҙҙән ашыу йәш режиссерҙың эше дәғүә иткән.
Беҙҙекеләрҙән тыш, Мәскәү сәхнәһендә Красноярск крайының, Бүрәт һәм Ҡара­сәй-Черкес республикаларының, Кемеров, Киров өлкәләренең, шулай уҡ Екатеринбург ҡалаһының театрҙары үҙ әҫәрен күрһәтәсәк.
Әйткәндәй, Айгиз Баймөхәмәтовтың “Ҡалдырма, әсәй!” повесы буйынса ҡуйылған тамаша республикабыҙҙа ҙур уңыш менән бара. Етем балаларҙың көнитмешен ысынбарлығында сағылдыр­ған әҫәрҙе Башҡортостандан тыш, Татарстанда, Бүрәт ерендә лә ҡарап өлгөр­ҙөләр. Ә инде 26 июндә ошо ижади төркөм “КОЛЯДА – PLAYS-2017” XI халыҡ-ара заман драматур­гияһы фестивале сиктәрендә Екатеринбург ҡалаһында сығыш яһаясаҡ.