М. Аҡмулла исемендәге Башҡорт дәүләт педагогия университетының “Ҡорос” халыҡ театры Удмурт Республикаһының Ижевск ҡалаһында үткән “Театр һәм балалар” төбәк-ара театрҙар фестивалендә ҡатнашты. Ижади бәйгелә “Ауылға ҡыҙҙар килде” спектакле беренселәрҙән булып синхрон тәржемәлә күрһәтелде.
Республикабыҙҙа танылыу яулап өлгөргән “Ҡорос”тар бындай сәхнәгә беренсегә күтәрелмәй, әлбиттә. Өс көн дауамында Ижевск халҡы Башҡор­тостан, Татарстан, Удмурт, Сыуаш, Ма­рий Эл республикаларының, Архангел, Киров, Ярославль өлкә­ләренең бере­һенән-береһе талантлы, сағыу театр­ҙарының тамашаһын ҡараны. Ҙур сәхнәлә Рәсәйҙең төрлө төбәктәренән килгән халыҡтарҙың сығышы, мәҙәниә­те бар ҡаланы моңға сорнаны, сихри сәхнә донъяһына әйҙәне. Фәдис Иҙри­сов башҡарыуын­дағы ҡурай көйҙәре, Әлиә Әбдрәши­тованың дәртле бейеү­ҙәре, Гүзәлиә Миңлебаеваның моңло йыр­ҙары удмурттарҙы битараф ҡал­дыр­маны, улар һоҡланып тамаша ҡылды, ҡабат-ҡабат сәхнәгә саҡырҙы. Киң күңелле, ҡунаҡсыл, алсаҡ удмурт халҡының туғандарса мөнәсәбәте барыбыҙҙы ла һоҡландырҙы.
Ә инде бәйгегә килгәндә, тыуған Башҡортостаныбыҙға беҙҙең “Ҡорос” халыҡ театры буш ҡайтманы: башҡорт филологияһы факультетының V курс студенты Илһам Теләүбаев “Беренсе пландағы иң яҡшы ир-егет роле” номи­нацияһында еңеп сыҡты, ә коллек­тивыбыҙ үҙе III урын яуланы. Ә беҙ үҙ сиратыбыҙҙа етәксебеҙ Илнур Лоҡма­нов­ҡа, М. Аҡмулла исемендәге Баш­ҡорт дәүләт педагогия университеты ректоры Рәил Әсәҙуллинға, башҡорт филологияһы факультеты деканы Луиза Сәмситоваға, уҡытыусыбыҙ Гөлсинә Килмәковаға һәм универ­ситетыбыҙҙың режиссерлыҡ белгесе Рәмзис Зәй­ҙуллинға рәхмәтебеҙҙе еткерәбеҙ.