Яңы исемдәр аса, тип яҙҙым да, авторҙарҙың һәр береһе Башҡортостан матбуғатын алдырып уҡығандарға таныш бит әле. Шулай ҙа киң мәғлүмәт сараларында әҫәрең баҫылыу бер шатлыҡ булһа, китап сығарыу – ул башлап яҙыусы өсөн генә түгел, ә һәр әҙипкә күңел байрамы, ҙур ҡыуаныс.
Уҙған йылды тантаналы йом­ғаҡлау тип тә ҡабул итергә була был китапты, ә мин уны яңы йылдың яҡшы хәбәрҙән башланыуы тип тә атаным. Оло шатлыҡ ме­нән уртаҡлашам: З. Биишева исе­мендәге "Китап" нәш­риә­тендә "Әҙәби нағыш" шиғыр­ҙар һәм проза йыйын­тығы донъя күрҙе. Башҡорт шиғ­риәтенең нервыһы ҡаҡ­ша­ған, башҡорт прозаһының ар­ҡа һөйәге һыныр сиккә еткән тигән заманда, 2015 йылда уҙған Әҙәбиәт йылы­ның дауамы булып, Сабит Фаз­лыев, Мәүлиҙә Әхмәт­йәнова, Миләүшә Ҡаһар­ма­нова, Венера Мәжитова (татар телендә), Ләйсән Мырҙа­ғолова, Раят Вә­ли­ев, Таң­һы­лыу Баһауетдинова, Ли­лиә Хәсәнова, Гөлшат Сама­това, Рузилә Иҫәнбаева, Нур­зилә Усманова, Эльмира Харисова, Илдар Исламов, Рәзилә Ырыҫҡужи­наның про­за әҫәрҙәре баҫылып сыҡты. Ә ун бер авторҙың шиғыр­ҙары тупланған. Йылдар дауамында һәр йәш шағир менән командировкалар, ижади кисәләр бары­шын­да танышып, ара­лаш­ҡас, улар­ҙың һәр береһенең ҡыуаны­сы минең өсөн дә шәх­си байрамға әүерелде. Фидаил Сафин, Фәнис Сирбаев, Венер Сәлихов, Айгөл Йәми­ле­ва, Гөлназ Искәндә­рова, Денис Ғилманов, Гөлү­зә Әх­мә­ҙи­ева, Гөлфирә Вә­лиева, Айгөл Муллағәлә­мова, Зә­ли­фә Байышева, Зөлфирә Сөнәғәтуллина (та­тар телен­дә) шиғырҙары айы­рым йы­йынтыҡ исеме аҫ­тында донъя күрҙе был китапта.
Ҡыуанығыҙ: башҡорт әҙә­биә­те­нә яңы тулҡын килә! Китап уҡыусылар һи­рә­гәйҙе, яҙыу­сылар ҙа юҡ кимәлдә, тип зар­ланырлыҡ урын юҡ. Ал­лаға шөкөр, ҡу­лы­на ҡәләм алыусылар бар һәм буласаҡ. Иң мөһиме – әйткән һүҙебеҙ­ҙе ишеткән, яҙға­ныбыҙ­ҙы уҡырға теләгән уҡыусыбыҙ­ҙы юғалт­мау.