Башҡортостандың Милли халыҡ ҡоралдары оркестрына нигеҙ һалған ҡурайсы, Рәсәйҙең атҡаҙанған, Башҡортостандың халыҡ артисы Рәмил Ғәйзуллин Алматыла “Бөйөк дала иле” халыҡ-ара фестивалендә ҡатнашты.
– Сара күңелдә йылы тәьҫораттар ҡалдырҙы. Солист булараҡ та сығыш яһаным – ҡурайҙа халҡыбыҙҙың “Ғилмияза” көйөн баш­ҡарҙым, шулай уҡ Ҡаҙағстандың “Сазген сазы” ансамбле ме­нән бергә уйнаным. Был коллектив Өфөлә үткән “Урал ауазы” II халыҡ-ара фестиваль-конкурсында Гран-при яулағайны, – тине Рәмил Ғәйзуллин. – Байрам юғары кимәлдә уҙҙы. Алматы аҡы­ны Бауыржан Байбек музыканттарҙың һәр береһенә рәхмәт белдерҙе.
Дипломдан тыш, ҡәҙерле бүләк – “Сазген сазы” етәксеһе Баг­дат Тилигенов ҡулынан алған ҡаҙаҡ думбыраһын алып ҡайтҡан музыкант. Ошо ансамбль нигеҙендә төрки халыҡтарының милли ҡоралдары йыйылма оркестры ойошторолған. Ул байтаҡ илдәрҙә сығыш яһап өлгөргән дә инде. “Мин күптән ошондай ансамбль төҙөү ниәте менән янам һәм уның ойошторолоуына бик шатмын”, – ти яҡташыбыҙ.
“Бөйөк дала иле” халыҡ-ара фестивале Ҡаҙағстан бойондороҡһоҙлоғоноң 25 йыллығы уңайынан уҙғарылды. “Алатау” традицион сәнғәт театрына Азербайжан, Үзбәкстан, Төркмәнстандан, Башҡортостан, Дағстан, Ҡарағалпаҡстан республикаларынан ҡатнашыусылар һәм ҡунаҡтар йыйылды.