Республика Башлығы Рөстәм Хәмитов телефон аша рапирасы Тимур Сафинды һәм уның тренерҙары Лира Грушина менән Руслан Нәсибуллинды Олимпия уйындарында шәхси иҫәптә бронза миҙал яулау айҡанлы ҡотланы.

Төбәк етәксеһе спортсыға уңышлы сығышы өсөн рәхмәт әйтте, уға һәм тренерҙарына артабан да еңеүҙәр, Олимпиадала команда ярыштарында ла оло ҡаҙаныштар теләне.
– Һеҙҙе Тыуған илебеҙҙә көтәбеҙ, – тине Рөстәм Хәмитов һәм спортсылар менән үҙебеҙҙә осрашырға ниәтләүе хаҡында белдерҙе.
Хәтерегеҙгә төшөрәбеҙ, 7 августа Бразилияның Рио-де Жанейро ҡалаһында уҙғарылған ХХХI Йәйге Олимпия уйындарында яҡташыбыҙ Тимур Сафин Британия рапирасыһы Ричард Крузды 15:13 иҫәбе менән еңде һәм бронза призеры булды. Был – йәш спортсының Олимпия карьераһында яуланған тәүге миҙалы.

***
Өфө ҡалаһы хакимиәте башлығы Ирек Ялалов та, яҡташыбыҙ Тимур Сафинды Бразилиялағы Олимпиадала яулаған бронза миҙалы менән ҡотлап, артабан да спорт мәктәптәренә ярҙам күрһәтәсәген белдерҙе.

– Минән йыш ҡына ҡала ни өсөн дүрт меңгә яҡын спорт мәктәбен ҡурсалай, был федераль власть хәстәре бит, тип ҡыҙыҡһыналар, – тине ул. – Бына ошондай егеттәр хаҡына. Ышанам, был миҙал һуңғыһы булмаҫ.
Эйе, был – Тимурҙың тәүге Олимпиадаһы ғына. Рапирасылар араһындағы донъя рейтингында ул беренсе тиҫтәгә лә инмәй. Тимәк, үҫергә мөмкинлектәр бар әле.
Ул арала яҡташыбыҙҙың башҡа иптәштәре лә һынатманы – алтын һәм көмөш миҙалдарға лайыҡ бул­ды­лар. Ҡылыс менән алышыуҙа бер юлы ике командалашы – Яна Егорян менән Софья Великая финалға сыҡты. Бәхет Янаға йылмайҙы.
Йәнә был көндө илебеҙ ир-егеттәре спорт гимнасти­каһында команда беренселегендә һәм брасс стилендә йөҙөүҙә Юлия Ефимова – икенсе, пневматик винтовканан атыуҙа Владимир Масленников өсөнсө урынды алды.