2019 йылда Мәжит Ғафури исемендәге Башҡорт дәүләт академия драма театры үҙенең 100 йыллыҡ юбилейын байрам итәсәк. Республика Башлығы Рөстәм Хәмитов ҡул ҡуйған указ төбәктәге хоҡуҡи мәғлүмәттәрҙең рәсми Интернет-порталында донъя күрҙе.

Юбилей сараларына әҙерлек һәм уларҙы үткәреү буйынса ойоштороу комитетына Башҡортостан Хөкүмәте Премьер-министры Рөстәм Мәрҙәнов етәкселек итә.
Мәжит Ғафури исемендәге Башҡорт дәүләт академия драма театрының тарихы 1919 йылда башлана. Ул – республиканың иң беренсе театры, башҡорт милли сәнғәтен һаҡлаусы һәм дауам итеүсе булып һанала. Тотош быуат дауамында театр татыулыҡ, изгелек һәм һөйөү идеалдарына хеҙмәт итә, үҙ сәхнәһендә юғары әхлаҡи ҡиммәттәрҙе сағылдыра, халыҡ мәҙәниәтен, туған телде, йолаларҙы һаҡлай, халҡыбыҙҙы берләштерә, милли рухты күтәрә.