Салауат дәүләт башҡорт драма театры 83-сө миҙгелде япҡан осорҙа Рәмзиә һәм Рафаэль Ғәйнуллиндарҙың йәш ғаиләһенә өс бүлмәле фатир асҡысы тапшырылды. Республикалағы бюджет өлкәһе хеҙмәткәрҙәре өсөн дәүләт социаль яҡлау программаһы ошондай мөмкинлек бирҙе.

Бәхетлеләрҙе Башҡортостандың мәҙәниәт министры урынбаҫары Шамил Абдраҡов ҡотланы. Ул шулай уҡ актерҙар Ренат Ибәтуллинға, Мирас Йомағужинға һәм Рәмзиә Ғәйнулли­наға министрлыҡтың Почет грамоталарын тапшырҙы.
Әйткәндәй, Ибраһим Абдуллиндың “Эх, Өфө ҡыҙҙары!” пьесаһы буйынса ҡуйылған спектаклдә Майя роле өсөн Рәмзиә Мәҡсүтова, Шәүрә Шәкүро­ваның “Оляның бәхете” (“Олюшкино счастье”) пьесаһы буйынса ҡуйылған спектаклдә Ольга роле өсөн Баш­ҡорт­остандың атҡаҙанған артисы Нәүфилә Яҡупова йыл актерҙары тип иғлан ителде. Иң яҡшы актерҙарға 1993 йылдан аҡсалата премия тапшырыла.
Салауат театры сираттағы миҙгел­де “Ерҙәштәр” спектакленең премье­раһы менән япты. Башҡортос­тандың халыҡ шағиры Мостай Кәримдең “Ауыл адвокаттары” повесы буйынса спектаклде Мәскәү режиссеры Антон Федоров ҡуйҙы.
Театрҙың матбуғат хеҙмәтендә хәбәр итеүҙәренсә, 2015 – 2016 йылғы миҙгелдә салауаттар Ханты-Манси автономиялы округында һәм Силәбе өлкәһендә гастролдә булған. Йәмғеһе 177 спектакль ҡуйылған, шул иҫәптән өс яңы спектаклдең икәүһе — федераль грант аҡсаһына. Театр яҡшы йолаға әйләнгән проекттарын да дауам иткән. Улар иҫәбенә “Театр — инвалид балаларға”, “Театр төнө” инә. Салауат дәүләт башҡорт драма театры ҡарамағындағы “Арлекин” студияһына йөрөгән балалар “Таланттар планетаһы” халыҡ-ара фес­тиваль-конкурсында лауреат булған.
Ошо көндәрҙә шатлыҡлы ваҡиға менән ҡотлап Ғөбәйҙуллиндарға шылтыраттыҡ.
— Фатирҙы барып күрҙек. Балала­рыбыҙ Хәҙисә менән Тимерхан шатланып үҙҙәренә бүлмә лә һайлап ҡуйҙы. Көҙөн ғаиләбеҙҙә ҙур ваҡиға көтөлә — бәпес алып ҡайтабыҙ. Шуға фатир асҡысы алыу оло ҡыуаныс. Беҙҙең хеҙмәтте баһалаған Хөкүмәте­беҙгә рәхмәт, — тине ғаилә башлығы.