Яҙыусы-сатирик Марсель Сәлимов (Мар. Сәлим) Ҡырымға ижади сәфәр ҡылды.
“ЯЛОС-2016” халыҡ-ара фестивалендә ҡатнашып, ул Ялта ҡалаһында ойошторолған әҙәби кисәләрҙә сығыш яһаны, урындағы яҙыусылар, журналис­тар, мәҙәниәт хеҙмәткәрҙәре,
сәнғәт эшмәкәрҙәре, Башҡортостандың Ҡырым Республикаһындағы вәкиллеге, урындағы Башҡорт ҡоролтайы башҡарма комитеты етәкселәре, Белорет районы китапханасыларының көньяҡ ярымутрауҙағы дуҫтары –
Кореиз китапханасылары
менән осрашты.


Фестиваль сиктәрендә Мар. Сәлимдең “Таврида” серияһында донъя күргән “Камушек с дыркой” китабының исем туйы ла уҙҙы. Юмо­ристың был китабы фес­тиваль бәйге­һендә беренсе урынды яуланы. Авторға лауреат дипломын халыҡ-ара фести­вал­дең ойоштороу комитеты рәйесе, Ялта әҙәби-ижтимағи берлеге етәксеһе Джемали Чочуа менән Яҙыу­сыларҙың һәм журна­листарҙың интернациональ берләшмәһе идараһы рәйесе Александр Гриценко тарихи урында – А.П. Че­ховтың Ялталағы йорт-музейында тапшырҙы.
Хужалар һәм ҡунаҡтар алдында сы­ғыш яһап, Марсель Сәлимов бөйөк урыҫ яҙыусыһы Антон Чеховтың Башҡортос­танға ҡымыҙ менән дауа­ла­нырға киле­үенә 115 йыл тулыу уңайынан үткәрелгән саралар, республикалағы әҙәби-мәҙәни яңылыҡтар тураһында һөйләне. Ул үҙе­нең Ялта әҙәби конфе­ренцияһындағы доклады баҫылған йыйынтыҡты һәм “Литературный Крым” гәзитен иҫтәлеккә музейға тапшырҙы. Күренекле башҡорт яҙыусыһының автографлы китаптары шулай уҡ Л.С. Делямуре исемендәге Белогорск район үҙәк китапханаһы, А.П. Че­хов исемендәге Ялта ҡала үҙәк китапханаһы һәм уның Кореиз филиалы уҡыусылары өсөн дә иҫтәлекле бүләк булды.