Шағирҙар сығыр әле22.12.2015
Төрки халыҡтар поэзияһы бик бай мираҫ ҡалдырған шағир, яҙыусылары менән данлы. Башҡорттарҙың Аҡмуллаһы, ҡаҙаҡтарҙың Абайы, үзбәктәрҙең Хорезмиһы... Әллә күпме әҙипте һанарға, барларға була. Барлау, тигәндән, һүҙ бейеклеген күтәреүсе ошондай сараларҙың береһе хаҡында һөйләмәксемен – күптән түгел Ф. Мостафина исемендәге 20-се Өфө ҡала башҡорт гимназияһында “Төрки халыҡтар поэзияһы” тигән кисә үтте. Ҡунаҡҡа М. Аҡмулла исемендәге Башҡорт дәүләт педагогия университетының башҡорт филологияһы факультеты вәкилдәре лә барҙы һәм сараны ойошторҙо.
Байрамды асып, факультет деканы, филология фәндәре докторы, профессор Луиза Сәмситова ялҡынлы телмәре менән залдағыларҙы йәнләндерҙе. Артабан кисә йырлы-моңло сығыштар менән үрелеп барҙы. II курс студенты Ислам Төхвәтуллин Рәми Ғариповтың “Кеше” шиғырын рухлы итеп һөйләне. I курс егеттәре Динар Ғайсин һәм Инсур Кинйәбаевтың дәртле “Ҡарағат” йыры ла бар тамашасының күңеленә нур сәсте.
Башҡортостандың Яҙыусылар союзы идараһы рәйесе, М. Аҡмулла исемендәге премия лауреаты Наил Ғәйетбаев сығышында төрки халыҡтары поэзияһының юғарылығын билдәләне. Философия фәндәре докторы, профессор Әхмәт Дәүләтҡолов был фекерҙе йөпләп: “Төркиҙәрҙең шиғриәте — һәр осорҙа ла донъяның иң көслө һәм ялҡынлы әләме”, — тине.
Башҡортостандың халыҡ шағирәһе Гөлфиә Юнысова уҡыусыларға шиғырҙарын рухи күстәнәс итеп алып килгән. Яҙыусы Сәрүәр Сурина әкиәтен уҡып ишеттерҙе. Ш. Бабич исемендәге республика йәштәр премияһы лауреаты, шағирә Лариса Абдуллинаның сығышы иң көслөһө ине. Уның телмәрендәге дәрт, илһам һәр уҡыусыға күптән көткән рухи күстәнәс булғандыр. Ул уҡыусыларға төрки халыҡтар шиғриәте буйынса һорауҙар яуҙырҙы, еңеүселәрҙе бүләкләне.
Төрки халыҡтар шиғриәтенә арналған кисә уҡыусыларҙың күңеленә барып етте. Уларҙың араһынан да берәй заман билдәле шағирҙар сығыр, ошо ижад ҡомарын, халҡы әләмен күтәрер әле.