Рәсәйҙең Дәүләт Думаһы депутаты, философия фәндәре докторы, профессор Зөһрә Йыһанур ҡыҙы Рәхмәтуллина:— Эйе, көндәлек тормошобоҙ ҡатмарлана, халыҡ ҡырыҫлана, тупаҫлыҡ, йәмһеҙлек күбәйә бара. Әммә оҙон ялҡытҡыс ҡыштан һуң наҙлы яҙ килә, ҡара болоттарҙы йырып ҡояш сыға, бөтмәҫ-төкәнмәҫ ҡараңғылыҡты еңеп яҡты өмөт тыуа. Бөгөнгө ауырлыҡтарыбыҙ ҙа мәңгелек түгел. Үҙебеҙҙе, балаларыбыҙҙы матурлыҡтан, әхлаҡ-әҙәптән мәхрүм итһәк, кемгә әйләнербеҙ һуң?
Иң тәүҙә мин донъя тотҡаһы булған ҡатын-ҡыҙға мөрәжәғәт итер инем: матурлыҡ, зауыҡ, әҙәп донъяһының алтын асҡыстары – Әсә ҡулында!
Халҡыбыҙ ғүмер баҡый киң күңелле, кешелекле, эскерһеҙ, ҡунаҡсыл булыуы менән дан ҡаҙанған. Балаларыбыҙ бер ҡасан да, бер ҡайҙа ла “Беҙ – Башҡорт еренән” тип әйтергә оялмаһын ине. Уларҙы кешелек донъяһына барып ҡушылырлыҡ ғорур тәбиғәтле, әҙәпле, алдынғы ҡарашлы шәхестәр итеп тәрбиәләй алһаҡ, әсәлек маҡсатыбыҙға, бурыстарыбыҙҙың үтәлеүенә өлгәштек, тип әйтә алырбыҙ.