Хәҙер күп милләтле Башҡортостандың фольклоры хаҡында бөтә донъя беләсәк. 2020 йылда республикала ер шарының һәр мөйөшөнән йөҙәр меңләп ҡунаҡ йыйыласаҡ. Әлегә тиклем мәҙәни олимпиада Голландия, Япония, Венгрия, Көнъяҡ Кореяла уҙғайны. Киләһе йылда фольклориада Мексикала үткәрелә.
Донъя халыҡтары менән таныштырған этнофестиваль майҙансығы һәр төбәктә асыласаҡ. Байрам ике аҙна дауамында һуҙыласаҡ, әйткәндәй, башҡорттарҙың йолаға әүрелгән һабантуйҙары осорона тап килтереп үткәрелә был сара. Унда донъя халыҡтарының көйҙәре, халыҡ кәсептәре һәм һөнәрҙәренең вернисажы күрһәтеләсәк, тағы ла милли ашамлыҡтар тәҡдим ителеүе күҙаллана.