27 октябрҙә “Башҡортостан” дәүләт концерт залында төрки донъяһы йәштәренең этноконцерты үтәсәк. Үҙенсәлекле проектта Башҡортостандың ғына түгел, Яҡутстандың, Ҡаҙағстандың киң билдәле сәхнә оҫталары сығыш яһаясаҡ. Сараны ойоштороусылар баш ҡала халҡын нимә менән ғәжәпләндерер икән? Был турала “Дан” ижад үҙәге етәксеһе, ошо тамашаның режиссеры Зәлифә Барлыбаеванан һораштыҡ.
– Был тамашаны ойош­тороу теләге ни­сек тыуҙы?
– Өфөлә уҙғарылған “Урал мо­ңо” фестива­лен­дә Саха (Яҡут) рес­пуб­ликаһынан килгән вир­­ту­оз ҡу­мыҙсы, йырсы Юлиана Криво­шапкина менән танышҡайным. Унан һуң да бәйләнеште өҙмәнек, аралашып тора­быҙ. Әйткәндәй, Юлиа­на – бик үҙенсәлекле ар­тист, уның сы­ғы­шын төрлө илдәрҙә көтөп алалар. Яҡут ҡыҙы ҡумыҙҙа бүре та­уышын да сығара, һандуғас булып та “һай­рай”. Шуны белә күреп, ниңә үҙебеҙгә саҡыр­маҫ­ҡа тигән теләк тыуҙы. Беҙ бит — ту­ғандаш ха­лыҡ­тар. Бер-бере­беҙҙең мә­ҙәниә­тен белергә те­йешбеҙ. Төрки ха­лыҡ­тарҙың артистарын бер май­ҙанға йыйып, йыр-моң аша дуҫ­лы­ғыбыҙҙы нығытырға ине теләгем. Тәҡдимемә Юлиана ҡар­шы кил­мәне, ихлас ризалашты. Бынан һуң Ҡа­ҙағстандың билдәле “Алашулы” этнотөркөмө етәкселәре менән дә бәй­ләнешкә индем. Улар ҙа башланғысты хуплап сыҡты.
– Шундай кимәлдәге сараны үткәреү ҡыйын түгелме?
– Әлбиттә, күләмле проекттарҙы тормошҡа ашырыу еңелдән түгел. Был йәһәттән Башҡорт­остандың Мәҙәниәт ми­нистрлығы, шулай уҡ Мат­буғат һәм киң мәғлү­мәт саралары агентлығы таяныс булды. Сараның кәрәклеген аңлап, ярҙам ҡулы һуҙған бағыусы­ларға ла рәхмәтлемен.
Бығаса үҙемдең төрлө кимәлдәге концерттар үткәргәнем булды. Улар Мәскәү сәхнәһендә лә, сит илдәрҙә лә уңышлы үтте. М. Ғафури исе­мендәге Башҡорт дәүләт академия драма театрында, телевидениела эшләгән осорҙа был йә­һәттән ярайһы уҡ тәж­ри­бә тупланым. Ошо эште яҡшы белгәс, әллә ни ҡыйынлыҡ тойманым.
– Концертта тағы ла кемдәр сығыш яһая­саҡ?
– Был проектты уйла­ғанда, үҙе­беҙ­ҙең мәҙә­ниәтте күрһәтеүҙе лә маҡ­сат итеп ҡуйҙым. Шуға ла халыҡ араһында киң танылыу яулаған һә­ләтле йәштәребеҙҙе лә концертҡа ылыҡтырҙым. Атап әйткәндә, ҡабат­лан­маҫ моң эйәләре Марсель Ҡо­тоев, Зилиә Бәх­тиева, Диана Иш­ния­зова, Катя Ямщикова сығыш яһаясаҡ. Халыҡ күңелен яулап өлгөргән “Арғымаҡ”, “Әс-сәләм”, “Ете­гән” этнотөркөмдәре лә сараны биҙәйәсәк.
– Ә нимәһе менән үҙенсәлекле һуң был проект?
– Беренсенән, бөтә артистар ҙа фоног­рамма­һыҙ йырлаясаҡ, йәғни йөҙ процент “тере тауыш” буласаҡ. Икенсенән, сит тарафтан килгән сәх­нә оҫталарының һәр сығы­шы – үҙе бер мөғжизә! Уларҙың һәр кемендә дәрт ташып тора. Донъя­ның виртуоз ҡумыҙсыһы Юлиана Криво­шапкина­ның сығышы әле берәүҙе лә битараф ҡалдыр­ғаны булманы. “Алашулы” төр­көмө егеттәре иһә ҡыҙ­ҙарҙың йөрәген әсир ит­мәй ҡалмаҫ. Ғөмүмән, тамашанан һәр кем дәрт алып, күтәренке кәйеф менән ҡайтыр тип уйлайым. Йөкмәткеһен алдан һөйләп, йәмен бөтөр­мә­йем әле. Йөҙ тапҡыр ишет­кәнсе, бер тапҡыр күр, тиҙәр бит...