З. Биишева исемендәге “Китап” нәшриәте ойошторған “Изге күңелдән — китап” акцияһы дауам итә. Был сараның маҡсаты – милли әҙәбиәтте пропагандалау, йәш быуында китапҡа ҡарата ҡыҙыҡһыныу тыуҙырыу, йәмәғәтселектең иғтибарын йәлеп итеү. Унда дәүләт ойошмалары, эшҡыуарҙар, ғөмүмән, теләгән һәр бер кеше ҡатнаша ала. Күпмегәлер һатып алынған китапты һәр кем балалар йорттарына, мәктәптәргә, дауаханаларға, китапханаларға, хатта күп балалы ғаиләләргә бүләк итә ала.

Тантаналы сараны З. Биишева исемендәге “Китап” нәшриәте директоры Илһам Йәндәүләтов асты. Баш мөхәррир урынбаҫары Олия Әнәс ҡыҙы акцияның уңышлы дауам итеүе хаҡында һөйләп, эстафетаны Республика һуҡырҙар өсөн махсус китапхана директоры Айгөл Әминеваға тапшырҙы.
Был китапхана “Китап” нәшриәте менән байтаҡ йылдар инде хеҙ­мәттәшлек итә, унда баҫылған бик күп баҫмаларҙы мөмкинлектәре сиклән­гән йәки тома һуҡырҙар өсөн Брайль системаһы буйынса нәшерләй. Ошо акция сиктәрендә А. Әминева 28-се махсус мәктәп-интернат уҡыусыла­рына тыуған яҡты өйрәнеү өсөн бик кәрәкле “Минең Уралым мең йылдар аша” тигән аудио-китап бүләк итте.
– Ишетмәгән, күреү һәләте булма­ған бер кеше лә яңғыҙ ҡалырға тейеш түгел, һәр кемдең уҡырға, әҙәбиәткә мөрәжәғәт итергә хаҡы бар. Китап беҙҙе ҡанатландыра ла, сафландыра ла, йәшәү дәрте лә бирә, шуның өсөн тауыш яҙҙырыу сту­дияһында тыуған яңынан-яңы баҫма­ларҙы уҡыусыларыбыҙға ваҡытында тәҡдим итеп торабыҙ, – тине махсус китапхана директоры.
Мәктәп-интернат директор урын­баҫар­ҙары Гүзәл Мыр­ҙа­гилдина һәм Айгөл Килмөхәмәтова был бүләк­тәрҙе ихлас күңелдән ҡабул итеп, ҡасандыр Салауат Низаметдиновты тәрбиәләгән уҡыу йортона, ундағы мөмкинлектәре сикләнгән балаларға иғтибар бүлгәндәре өсөн рәхмәт әйтте.
Республикабыҙҙың Милли симфоник оркестры директоры, күренекле скрипкасы Алексей Воронин Арыҫлан Мөбәрәковҡа арналған фотоальбом­ды һәм тағы ла бер нисә ҡиммәтле китапты А. Мөбәрәков исемендәге Сермән балалар йортона тапшырҙы.
Был акциянан, әлбиттә, башҡорт шағирҙары ситтә ҡалғаны юҡ. Республикабыҙҙың Салауат Юлаев исемендәге дәүләт премияһы лауреаты Ирек Кинйәбулатов та, үҙ нәүбәтендә, “Китап” нәшриәтендә сыҡҡан тиҫтәгә яҡын китапты һатып алып 28-се махсус мәктәп-интернат уҡыусыларына бүләк итте.
Йәштәргә, уҡыусы балаларға, күп балалы ғаиләләргә йүнәлтелгән был акцияны эстафета буйынса респуб­ликаның Дуҫлыҡ йорто директоры Азат Ибраһимов һәм “Сәнғәт әһел­дәре” фонды етәксеһе Әлмира Соломинова ҡабул итте. Күренекле журналист һәм юморист-шағир Марсель Сәлимов киләһе марафонда ҡатнашырға теләген белдерҙе.
Акция дауам итә, әйҙәгеҙ, дуҫтар, уға берҙәм ҡушылайыҡ!