Ҡаҙағстандан килгән ҡунаҡтар Милли әҙәби музей филиалы — Миәкә районының Туҡһанбай ауылындағы Мифтахетдин Аҡмулла музейында булды.

Делегацияға яҙыусы, әҙәби тәнҡитсе, Әхмәт Ясауи исемендәге Халыҡ-ара ҡаҙаҡ-төрөк университетының вице-президенты, Ҡаҙағстан Яҙыусылар союзы идараһы ағза­һы, филология фәндәре докторы, профес­сор Ергобәк Ҡолбәк етәкселек итте. Ҡунаҡтарҙы яҙыусы, профессор, әҙәбиәт белгесе, филология фәндәре докторы Мирас Иҙелбаев менән шағирә, Башҡортостан Яҙыу­сылар союзы идараһы ағзаһы Гөлфиә Юнысова оҙатып йөрөнө.
– Ҡаҙағстан ҡунаҡтары мәғрифәтсенең тормошо һәм ижады хаҡында яҡшы хәбәрҙар. Ҡайһы бер мәсьәләләр буйынса хатта бәхәс­ләшеп тә алдыҡ, — ти Аҡмулла музейы мөдире, яҙыусы Фәнис Янышев.
Ҡунаҡтарҙы шулай уҡ Бөрйән районын­дағы Шүлгәнташ мәмерйәһенә, Миәкә районындағы изге Нарыҫтау шишмәһенә алып барҙылар.