Мәктәптә уҡып йөрөгән саҡ. Бер көн райондың “Йондоҙ” гәзитендә “Мағаш тауышы” исемле әҙәби түңәрәк асылыуы тураһында хәбәр баҫылып сыҡты. Үҙем дә шиғриәт менән мауыҡҡан кеше булараҡ, күңелдә ҡанаттар үҫкәндәй булды. Тора-бара мине лә түңәрәк ултырышына саҡырып яҙған хат килеп төштө. Осоп барҙым. Исемдәрен гәзиттә баҫылған әҫәрҙәре аша ғына белгән районыбыҙҙың шағирҙары менән таныштым. Киләсәгем дә шунда хәл ителгәндер тип уйлайым хәҙер, сөнки “Мағаш тауышы” әҙәбиәт донъяһына әйҙәне мине. Әлбиттә, бер мине генә түгел, түңәрәктең ойоштороусыһы һәм етәксеһе, ул саҡта “Йондоҙ” гәзитенең баш мөхәррир урынбаҫары, шағир Нияз Сәлимов күптәргә моң иленә юл күрһәтте.
Ҡайнап торҙо әҙәби түңәрәк: районда үткән төрлө сараларҙа ҡатнаштыҡ; Өфөнән, Стәрлетамаҡтан килгән шағир-яҙыусылар менән осрашыуҙар үткәрҙек; ҡулъяҙмалар тикшерҙек; гәзиттә шиғырҙарыбыҙ, хикәйәләребеҙ баҫылды... Нияз Сәлимов Өфөгә эшкә күскәндән һуң, үкенескә ҡаршы, “Мағаш тауышы”ның моңо тынып ҡалды.
Күптән түгел районыбыҙҙың “Табын” гәзитенән ҡыуаныслы хәбәр килеп төштө: “Әҙәби ижад менән шөғөлләнеүселәр, “Мағаш тауышы”н тергеҙеү маҡсатында, редакцияла һөйләшеүгә йыйылды”, – тиелә унда. Түңәрәктең етәксеһе итеп уҡытыусы-шағирә Рәмзиә Монасипова һайланған. Бик мәслихәт! Уға беҙ ижади уңыштар теләйбеҙ, “Мағаш тауышы”ның моңо алыҫтарға яңғырар тип өмөтләнәбеҙ. Районыбыҙҙа Фәрғәт Ғәлин, Саимә Игелекова, Фәүзиә Ҡотлогилдина, Әминә Йәрмиева, Разия Зәйнуллина кеүек шиғри йәнле кешеләр йәшәй бит!



КҮҢЕЛЕМ ЙЫРЛАЙ

Ҡояш ҡалҡа. Күңел-күлде
Наҙлы аҡҡоштар биләй.
Шаян елдәр болоттарҙан
Дебет шәлгә йөн иләй.

Ысыҡҡа үлән мансылған,
Тереһыу эскәнме ни.
Талғын елгә йәнләнәләр
Йәрәшеп сәскә менән.

Күбәләктәр уянғандар,
Сәскә битен үбәләр.
Һандуғастар ҡыуаҡтарҙан
Моң тамсыһын түгәләр.

Илаһи йәм, сихри тылсым
Донъяны нурға сорнай.
Сеү, өндәшмә, һин дә тыңла –
Донъя һөйөүҙе ҙурлай.

Саимә ИГЕЛЕКОВА.

БУРАН

Иҫеңдәме, ҡот осҡоһоҙ буран
Ҡоторона ине урамда.
Ә беҙ, иҫәр, юлға сыҡҡан инек,
Үс иткәндәй ошо буранға.
Йөрәктәге буран һымаҡ хисте
Ауыҙлыҡлай алмай бер нисек,
Ҡосаҡтарға беҙ ташланған инек,
Бер тән булып икәү ул кисте.
Тәндәр – тәнгә, йәндәребеҙ йәнгә
Ҡушылғандай ине мәңгегә.
(Бөтәһе лә сағым һымаҡ ҡына),
Иренемдә ҡалды тәм генә.
Һинең һөйөү тәмең. Мәңгегә.

Рәмзиә МОНАСИПОВА.

БАШҠОРТОСТАНЫМ

Еҙем буйҙарын, Егән буйҙарын
Бик күп буйланым.
Тыуған яҡтың саф һауаһын
Һулап туйманым.
Йөрәгемде елкендерә
Татлы һыуҙарың.
Эскән һайын шул һыуҙарҙы
Килә йырлағым.
Һағыштарҙы тиҙ тарата
Иҙел буйҙары.
Алыҫтарға киң тарала
Ҡурай моңдары.
Дан йырлаһа үҙ иленә
Башҡорт улдары.
Һәр саҡ шулай үҙ илемдә
Булһын дуҫтарым!
Йәшә, гөрлә, данға күмел,
Башҡортостаным!

Миңтимер КӘРИМОВ.

ЯҠШЫ ҺҮҘ

Яҡшы һүҙ — ул йән аҙығы, тиеп
Ололар бит белеп әйткәндәр,
Матур һүҙҙәр генә һөйләйексе,
Әрнетмәһен беҙҙе үткәндәр.
Яман һүҙ — ул баш ҡаҙығы,
тиҙәр
Был мәҡәлде улар тамамлап,
Күпме баштарҙы бит ҡатыралар
Ғәйепһеҙгә кеше яманлап.
Бер-береңә матур һүҙҙәр һөйләп
Йәшәйексе ғүмер иткәндә,
Йәндәребеҙ ризыҡһыҙ ҡалмаһын
Яҡшы һүҙҙәр генә көткәндә!

Фәүзиә ҠОТЛОГИЛДИНА.


ЙӘШӘҮ – БӘХЕТ!

Донъя матур, йәшәү еңел,
Пар ҡанат булһа иңдә.
Күңелеңде күтәрерҙәй
Дуҫтар булһа эргәңдә.

Улың-ҡыҙың йүгереп тә
Уйнайҙар икән янда,
Атаң-әсәң, туғандарың
Һау-сәләмәт булғанда,

Нисек зарланаһың инде,
Иламайым – мин көләм.
Булғандарға шөкөр итеп,
Бәхетле донъя көтәм.

Әминә ЙӘРМИЕВА.

ТАЛЬЯН ГАРМУН

Тальян гармун уйнағанда
Күтәрелә күңелдәр.
Сәскәләргә бөрөләнә
Шул моңдан хатта гөлдәр.

Тальян гармундың көйөнә
Ҡыҙҙар төштө бейергә,
Араһынан иң сибәрен
Һайланым мин ғүмергә.

Тальян гармундың моңдары
Таралһын тирә-йүнгә.
Болондарға, урмандарға,
Ҡош моңо булған ергә.

Тальян моңон ишетһендәр
Яҡын-тирә ауылдар.
Йөрәктәргә дәрттәр бирһен,
Өҫтәлеп торһон моңдар.

Фәйез САДИҠОВ.