Иҫ киткес шәп концерт ҡараныҡ, уны Туйсиндар ғаиләһе ҡуйҙы. Бала саҡҡа, йәнтөйәккә ҡайтып, урындыҡҡа ятып ял иткәндәй, һағышланып мейескә утын яҡҡандай, йәшел сиҙәмле ишек алдында йүгереп алғандай, һалҡын шишмә һыуынан ауыҙ иткәндәй булып, бер ҡыуанып, бер хисләнеп, бер моңайып ҡараныҡ байрамды. Тыуған йортҡа, әсәй-атайға дан йырланды унда. Гүзәл йәшлеккә, тәүге мөхәббәткә лә илтте ул, көлдөрҙө лә, күңелде лә күтәрҙе.
Ә иң тетрәндергәне һуғыш ту­­­раһында “Фатимам” йыры бул­­­ды. Уны илай-илай тың­ла­ныҡ, аяғөҫтө баҫып алҡыш­ланыҡ.
Туйсиндарҙың был концерт программаһын 9 Май алдынан тотош район ауылдары буйлап йөрөткәндә бик фәһемле бу­лыр, сөнки ул атай йортон һаҡ­лау, нигеҙен ҡоротмау, барлыҡ туғандарыңды шунда йыйып ғү­мер итеү, нәҫел ептәрен дауам итеү, нығытыу мәсьәләләрен күтәрә.
Түбәтәй кейгән Рәмил Туй­син­дың “Лә илаһи иллал­лаһ” тигән дини йырҙы башҡарыуы ла күңелгә ятышлы булды. Концертты Земфира Байбулдина бик матур, оҫта итеп алып барҙы.
Туйсиндарҙың Баймаҡ ра­йонының бәҫен, данын күтәреп йөрөгәндәре өсөн ҡыуанабыҙ һәм рәхмәт әйтәбеҙ. Ижадтары һүнмәһен, дәрттәре һүрел­мәһен!