«Һылыуҡай» республика телевизион гүзәллек бәйгеһенең һайлап алыу туры быйыл 10 мартта Өфө ҡалаһының «Мегаполис» мәҙәни-күңел асыу комплексында урынлашҡан «Театро» клубында үткәреләсәк.
Башҡортостандың Мәҙәниәт министрлығы һәм уның ҡарамағындағы Республика халыҡ ижады үҙәге, «Һомай» дефиле-театры ойошторған сара Рәсәйҙә иң оҙайлы һәм ғөрөф-ғәҙәттәрҙе дауам итеүсе милли конкурс булып танылған. Уның баһалама комиссияһында билдәле композиторҙар, сәхнә оҫталары, продюсерҙар һәм йәмәғәт эшмәкәрҙәре бар.
Иң популяр башҡорт шоуының финалына үтер өсөн ҡатнашыусыларға үҙҙәрен өс этапта күрһәтеү шарт: «визитка» (ҡыҫҡаса үҙең менән таныштырыу), «ижади бәйге» (йыр һәм бейеү), «дефиле». Шулай уҡ портфолио алып килеү мотлаҡ. Финалға сығасаҡ 16 — 24 йәшлек һылыуҙың буйы 168 сантиметрҙан түбән булырға тейеш түгел. Гүзәл заттың кейәүҙә булмауы ла мотлаҡ.
Конкурсты ойоштороусылар әйтеүенсә, быйылғы финалда Әҙәбиәт йылына бағышланған ижади һынауҙар буласаҡ. Шуға күрә башҡорт телендә иркен аралаша белеү талап ителә. 10 мартҡаса 10 ҡыҙ һайлап алынырға тейеш, йәмғеһе 12 ҡыҙ көс һынашасаҡ, сөнки Өфөләге бәйгелә ҡатнашыу мөмкинлегенә эйә булған Әлфиә Килдейәрова менән Лениза Әбделмәнова, Мәскәү һәм Санкт-Петербург һылыуҡайҙары конкурсында еңгәнгә күрә, туранан-тура финалға үтте.
«Һылыуҡай-2015» бәйгеһенең финалы 10 апрелдә «Башҡортостан» дәүләт концерт залында уҙасаҡ. Әле билдәле булыуынса, сараға ҡунаҡ сифатында танылған поп-йондоҙ Элвин Грейҙың (Радик Юлъяҡшин) һәм «Turkvision» халыҡ-ара фестивале лауреаты «Заман» этно-рок төркөмөнөң килеүе көтөлә.