Мәғариф һәм мәҙәниәт ойошмаларында башҡорт яҙыусыһы Сәғит Агиштың тыуыуына 110 йыл тулыуға арналған саралар уҙғарыла. Туймазы районы мәктәптәрендә лә уҡыусылар конференциялары, тематик сәғәттәр үтә.Ҡалалағы 4-се китапханала “Ул китаптарҙа һәм изге эштәрҙә йәшәүен дауам итә” тип аталған әҙәби таныштырыу сараһы барыһының да күңеленә хуш килде. Уҡыусылар яҙыусының ижади эшмәкәрлеге, әҫәрҙәре хаҡында ҡыҙыҡлы мәғлүмәт алды.
Бишҡурай ауыл китапханаһында иҫтәлекле датаны “Сәғит Агиш – яҙыусы һәм педагог” күргәҙмәһе менән билдәләргә ҡарар иттеләр. Китап күргәҙмәһендә йәштәр уның әҫәрҙәре, гәзит һәм журналдарҙа донъя күргән әҙип хаҡындағы мәҡәләләр менән танышты.