20 ғинуарҙа М. Ғафури исемендәге Башҡорт дәүләт академия драма театрының бер төркөм артисы билдәле шағирә Лариса Абдуллина ижадына арналған әҙәби-музыкаль кисә менән Дәүләкән ҡалаһына юллана.

Тамашасы яратып ҡараған “Ҡыҙҙар моңо – моңо халҡымдың” шиғри-музыкаль проекты сиктәрендәге был кисә башланып торған Әҙәбиәт йылына арнала.
Шағирәнең тыуған яғында уҙғарыласаҡ был кисә театр һәм шиғриәт һөйөүселәргә күркәм бүләк буласаҡ. Унда Рәсәйҙең һәм Башҡортостандың халыҡ артисы Хөрмә­тулла Үтәшев (проект авторы), Баш­ҡортостандың халыҡ артистары Сара Буранбаева, Илдар Ғүмә­ров, Светлана Хәкимова, Башҡортос­тан­дың атҡаҙанған артистары Алһыу Ғәлина, Гөлнара Әмирова, Рәзифә Динмөхәмә­то­ва, йәш артистар Руслан Хайсаров, Гөл­нара Ҡаҙаҡбаева, Урал Әминев, Фәнис Рәх­мәтов ҡатнаша. Тамаша район мәҙә­ниәт һарайында көндөҙгө сәғәт 1-ҙә – мәк­тәп уҡыусылары, сәғәт 6-ла өлкәндәр өсөн ойошторола.
Бынан тыш, район мәҙәниәт йортоноң фойеһында “Башҡортостан” гәзитенә яҙы­лыу мөмкин буласаҡ. Баҫмабыҙҙы алды­рырға теләүселәргә бүләктәр ҙә ҡаралған. Рәхим итегеҙ, дуҫтар, шиғри моң менән һуғарылған кисәгә!