Өфөлә “Байыҡ” республика телевизион конкурсында финалға сығыусылар билдәләнде. Ҙур сара ҡала мәҙәниәт һарайында үтте.
“Яңғыҙ бейеү” номинацияһында ир-егеттәр араһында – Ишембай районынан Эмиль Һөйәрғолов, ҡатын-ҡыҙ­ҙар­ҙан – Баймаҡ районынан Рәмзиә Солтанова, ансамбл­дәрҙән Әбйәлилдән “Йәшлек” менән Баймаҡтан “Ирәндек” төркөмдәре төп бүләкте яуланы. Гала-концертта бөтә республиканан, шулай уҡ Һамар, Чечня, Төньяҡ Осетия, Тыва, Ҡырғыҙстандан 500-гә яҡын бейеүсе ҡатнашты.
“Байыҡ” — һәүәҫкәр башҡарыусылар бәйгеһе. Быйыл ул етенсегә уҙҙы. Конкурстың һайлап алыу туры йыл буйы дауам итә. Аҙна һайын республиканың төп телеканалы башҡорт бейеүҙәрен яратҡан тамашасыларҙы телевизор экраны алдына йыя. Улар оҡшаған бейеүсе өсөн тауыш биреү мөмкинлегенә эйә. Тамашасыларҙан тыш, бейеүселәргә танылған артистар һәм ижади эшмәкәрҙәр баһа бирә. Йыл һайын бәйгенең финалында сит илдән ҡунаҡтар ҙа ҡатнаша.