Ҡурай моңона ҡойоноп, “Йәшлек” халыҡ бейеүҙәре ансамбленең “Башҡортостан – гөлбостан” хореографик композицияһы тамашаны асып ебәрҙе. Дәрте ташып торған йәштәрҙең сығышы залдағыларҙың йөҙөнә нур өҫтәгәндәй булды. Ағиҙел ҡалаһы хакимиәте башлығы Олег Крысиндың телмәрендә һүҙ халыҡтар дуҫлығы, милли мәҙәниәттәр аша кешеләрҙең йөрәгенә рухи күпер һалыу тураһында барҙы. Ни­мәһе ҡыуаныслы: ул байрам­дың башынан аҙағына тиклем сараны тамаша ҡылды. “Олег Анатольевич Ағиҙел ҡала­һындағы һәр милли мә­ҙәниәт байрамында ҡатнашты, сығыш яһаны”, – тине сараны ойоштороусылар. Донъяның әле теге, әле был мөйөшөндә милли ерлектә низағтар сығып торған заманда етәкселәрҙең тыныслыҡҡа әйҙәгән байрамдарға битараф булмауы – ыңғай күренеш. Ә бит халҡы нисек йәшәгәнен, ниндәй саралар уҙғарғанын белмәгәндәр ҙә юҡ түгел.
Олег Крысин хеҙмәт ҡаҙаныштары өсөн “Ынйы­лар” ансамбле етәксеһе Фәнисә Семенушкина, “Иҙел” мәҙәниәт йортоноң художество етәксеһе Резеда Хатипова, ҡала мәктәптәренең башҡорт теле уҡытыусылары Мәрүә Хәбибуллина, Фирүзә Зыязетдинова, Шакирә Ямалова, Фәриҙә Һөйөн­дөковаға бүләктәр тапшырҙы. Ҡа­ланың башҡорт теле уҡы­тыусылары ансамбле башҡа­рыуындағы “Тирәк­кәйем” йыры яуап һүҙе булып яңғыраны.
Бөтә донъя башҡорттары ҡорол­тайы Башҡарма комитетының мәға­риф бүлеге етәксеһе Рәйсә Күзбәкова, “Киске Өфө” гәзитенең баш мөхәррире Гөлфиә Янбаева шулай уҡ халыҡты байрам менән ҡотлап, Мәҙәниәт йылында әүҙемлек күрһәткән Р. Хатипова менән Ф. Һө­йөндөкованы тәбрикләне. Нефтекама ҡала баш­ҡорттары ҡорол­тайы етәксеһе Зилә Аҙнабаева, таныл­ған ҡурайсы Айбулат Рәхмәтуллин, йырсы Раян Алтыншин, “Түңгәүер” бейеү ансамбленең бөркөттәй егеттә­ре күршеләренең сараһынан ситтә ҡалманы – һәр сығыш дәррәү алҡыштарға күмелде. Һәүәҫкәр башҡа­рыусы Афзал Низамовтың моң­дары халыҡсанлығы менән арбаһа, Ағиҙел ҡалаһының башҡорт гимназияһы малайҙары башҡарыуындағы “Шайморатов генерал” йыры балаларса ихласлығы менән әсир итте. Их, ошо малайҙарҙы Өфө сәхнәһендә күрергә ине ул! Илнур Шәүәлиев етәксе­легендәге ҡумыҙ­сылар ансамбле сығышы ла йылы тәьҫир ҡалдырҙы. Балалар музыка мәктәбе уҡытыу­сылары Гөлназ Төх­вәтуллина менән Гөлназ Ғилмет­динова, баяндарҙы моңландырып, халыҡ көйҙәренә теҙмә уйнаны. “Йәшлек” халыҡ бейеүҙәре ансамбле “Ҡурай”, “Гөлнәзирә” һәм мари бейеүен башҡарҙы. Ошо кисәлә үк башҡорт мәҙәниәте көндәрен мари халҡы байрамдары алыштырҙы.
Ағиҙел ҡала башҡорт гимна­зияһының “Аманат” фольклор төркөмө сәхнәгә алып сыҡҡан “Исем ҡушыу” йолаһынан күренеш һәр кемдең кү­ңеленә хуш килде – урынлы таҡмаҡ­тар, йырҙар, бейеүҙәр залға нур көлтәһе ташланы. “Ноктюрн” өлгөлө вокаль ансамбле башҡа­рыуындағы “Баллы ил” композицияһы ҙур тамашаға өндәү билдәһе ҡуйған­дай булды. Йырлы сығыш Ағиҙел ҡалаһын, тотош Башҡортостанды һүрәт­ләгәйне.
Төбәктәге башҡорт мәҙәниәте байрамы күңелдә матур тойғолар ҡал­дырҙы. Иң ҡыуандырғаны мәҙәни сарала балаларҙың күпләп ҡатна­шыуы һәм рәхәтләнеп башҡорт телен­дә һөйләшеп, йырлап, сығыш яһауы булды. Ҡайтҡас та кисә хәтергә төшөп, күтәренкелек тойғоһо биләне күңелде. Тап ана шул фольклор йолалары, мәҙәни саралар аша халыҡтың рухи ҡанаттары нығый.