Нефтекама үҙе бер бәләкәй Башҡортостан төҫлө: бында баш­ҡорт, татар, рус, мари, ук­ра­ин, удмурт милләте вәкил­дәре йәшәй. Башҡорт дәүләт универ­ситетының Нефтекама филиа­лы бинаһында уҙған сарала ерлектәге халыҡтарҙың үҙ-ара мөнәсәбәте хаҡында ла фе­кер булды. Байрам кисә­һендә Мәҙә­ниәт йылы һөҙөмтәләре менән бергә артистарҙың сығышы үре­леп барҙы.
Тәүгеләрҙән булып сәхнәгә шағирә, билдәле йәмәғәт эшмә­кәре Гүзәл Ситдиҡова сыҡты. Һиҙелеп тора, халыҡ китап уҡый­мы ни ул, тиһәләр ҙә, Гүзәл апай шиғыр һөйләй башла­ғай­ны, зал тынып ҡалды. Шағирә филиал китапханаһына, урын­да­ғы ҡоролтай ағзаларына, филармония артистарына ки­тап­та­рын бүләк итте, байрам менән тәб­рикләне.
Нефтекама ҡалаһы башҡорт­тары ҡоролта­йы рәйесе, Баш­ҡортостандың атҡаҙанған таби­бы Азат Үтәкәев йыл дауамын­да башҡорт телен һәм әҙә­биә­тен пропагандалауға үҙ өлөшөн ин­дергән башҡорт теле уҡытыусы­ларына – Гөлна­ра Шәрәфиева, Юлиә Рәхмәтул­лина, Әминә За­кирйәнова, Ләй­сән Әкбәрова, Светлана Ниғмәтйә­нова, Гөл­сә­сәк Яҡшығолова, Әлфирә Әх­мәт­шинаға – диплом һәм бү­ләк­тәр тапшырҙы. Азат Нәзир улы Бөтә донъя баш­ҡорт­тары ҡоролта­йының иң ҙур наг­радаһы – “Ал да нур сәс хал­ҡыңа” миҙалы менән Башҡорт­остан­дың атҡаҙанған мә­ҙәниәт хеҙ­мәт­кәре, “Урал” баш­ҡорт халыҡ үҙәге филиалы етәксеһе Зилә Аҙнабаеваны бүләкләне. Күп милләтле тө­бәк­тә милләтеңдең ҡаһарманы бу­лыу һәм башҡа халыҡтар менән уртаҡ тел та­быу еңел түгелдер, бәлки, әммә мөмкин. Классик­тарҙың береһе әйткән бит әле, үҙ халҡын ярат­ҡан кеше башҡа­ларға битараф була алмай, тип. Зилә Рамаҙан ҡыҙы милләттәш­тәрен берләш­тереп, күп төрлө мәҙәни, әҙәби саралар башында тора, үҙе режиссер, сценарий ав­торы бу­лараҡ та сығыш яһай, яғымлы тауышы менән даими рәүештә радио эфиры аша тө­бәк­­тәге яңылыҡ­тарҙы еткерә. Ки­лә­сәктә лә йөрәгендә халҡы ял­ҡыны дөр­ләп яныуын теләйек!
Зилә ханым үҙ сиратында Мә­ҙәниәт йылында әүҙемлек күр­һәткәндәрҙе тәбрикләп үтте. Бү­ләккә Нефтекама башҡорт гимназияһынан Гүзәл Ғайсина, Нефтекама дәүләт филармо­ния­һы артистары Зәбирә Әми­не­ва, Рита Ҡарасурина, дан­лыҡ­лы ҡурайсы Айбулат Рәхмәтуллин, виртуоз баянсы Марс Ишморатов лайыҡлы булды.
“Башҡортостандың ете мөғ­жи­зә­һе” исемлегенә ингән, ошо көндәрҙә Интернетта тауыш би­реү юлы менән республикабыҙ йөҙөн Рәсәй кимәлендә билдә­ләгән ҡурайға ла мәҙхиә йырланды был кисәлә. Башҡорт дәүләт университетының Нефтекама филиалы студенттары был үҫемлек хаҡында шиғырҙар уҡыны, ҡурай тура­һын­да музыка ҡоралы булараҡ ҡына түгел, ә уның халыҡтың ҡото, ырыҫы икәнлеге лә бәйән ителде.
Ул арала Нефтекама филар­монияһының (етәксеһе – Рәйес Исмәғилев) “Түңгәүер” бейеү ансамбле тамашасыны берсә ша­ян, берсә уйсан бейеүҙәре ме­нән әсир итте. Һауаны ярып осҡан бөркөттәй, сая егеттәр, береһенән-береһе һылыу ҡыҙ­ҙар сәхнәнән залға ижад ҡо­ма­ры ташланы. Бер ниндәй фо­ног­рам­маһыҙ йырлаған Зәбирә Әми­не­ва, Илгиз Миңләхмә­тов­, Азат менән Илшат Ҡа­ра­суриндар тауыштары ғына түгел, һайлаған юлдарына ихтирам той­ғоһо ме­нән үҙҙәренә ҡарата йылы мө­нә­сә­бәт уятты. Марс Иш­мо­ра­тов­тың бармаҡтары ба­янға ҡуша үҫкән кеүек. Юҡ, уйнамай, ә йәшәй ул баяны менән бер бөтөн булып! Айбулат Рәх­мәтуллин ҡурайына тө­шөп бе­йеп китмәй саҡ түҙеп улты­рылды. Ихласлыҡ һәм тере моң тигән­дәре шулдыр, күрәһең.
Сара һуңында Нефтекама­ның Милли үҙәктәр берләшмәһе рәйесе Мөхәсәнә Йәғәфәрова, төбәктә башҡорт мәҙәниәте үҫе­шен юғары баһалап, һәр ҡатна­шыусыға рәхмәт һүҙен ет­керҙе. “Башҡорт мәҙәниәте һәм яҙ­ма­һы” айлығы тамам, артабан үҙе­нең ҡаҙаныштары ме­нән мари милләте вәкилдәре таныштырыр”, – тип, Нефтекама башҡорт ҡоролтайы рәйесе Азат Нәзир улы “Милләттәр дуҫлығы” кубогын мари милли үҙәге етәксеһе Игорь Губаевҡа тапшырҙы.
“Башҡортостан” гәзите вәки­ле булараҡ рухи сарала ҡат­нашҡанбыҙ икән, әлбиттә, беҙгә баҫмабыҙ тураһында һүҙ әйтеп китеү мөмкинлеге лә бирелде. Хөрмәтле гәзит уҡыусылар, “Баш­ҡортостан” гәзите – һәр бере­геҙ­ҙең яҡын дуҫы, әхлаҡи, мәҙәни, хоҡуҡи, рухи терәгегеҙ! Дәүлә­тебеҙ барлыҡҡа килгән осорҙан алып сыға башлаған ерлектәге төп баҫма ул. Үҙ хәбәрсебеҙ Ан­сар Нуретдинов та сарала ҡат­на­шыусыларҙы гәзиткә яҙы­лыр­ға өндәне. Бергәләп яҙайыҡ рес­публикабыҙ тарихын, берҙәм­лек­тә генә беҙҙең көсөбөҙ кү­ре­нер, һәр ғәмәлебеҙ халҡыбыҙ мән­фәғәтенән сығып башҡарыл­һын!
Ана бит баш ҡаланан алыҫ ятһалар ҙа, төрлө милләттәр йәшәгән төбәктәге Нефтекама башҡорттары рухи яҡтан ойошоп, яңы үрҙәргә атлай! Ысын тормош менән йәшәгәндәр, эш­ләгәндәр, ижад иткәндәр генә үҙ маҡсатына тоғро ҡалып, ғүмер­ҙең һәр миҙгелен үҙҙәре биҙәй беләлер!..